సినీ పరిశ్రమలో ఏ చిత్రం విడుదలైనా.. అది బాక్సాఫీస్ వద్ద వసూళ్లు ఎలా రాబట్టింది!, నటీనటులు ఎంత పారితోషికం తీసుకున్నారనే దానిపై అభిమానులు ఎక్కువగా ఆసక్తి చూపిస్తుంటారు. అయితే బయోపిక్లకు తమ వ్యక్తిగత సమాచారాన్ని అందించిన కొందరు ప్రముఖులూ కొంత పారితోషికాన్ని ఆశిస్తుంటారు. బాలీవుడ్లో రూపొందిన ధోనీ బయోపిక్ నుంచి 'సంజు' చిత్రం వరకు తమ వ్యక్తిగత జీవితాలను బయోపిక్లుగా తెరకెక్కించేందుకు పలువురు సెలబ్రిటీలు అంగీకారం తెలిపారు. ఇందులో భాగంగా తమ వ్యక్తిగత జీవితం గురించి చిత్రబృందానికి సమాచారం ఇవ్వడం సహా కొన్నింటిలో సహాయపడేందుకు ఆ వ్యక్తుల నుంచి నిర్మాణ సంస్థలకు అంగీకారం లభిస్తుంది. ఇలా తమ జీవితాధారంగా తెరకెక్కిన బయోపిక్లకు పలువురు ప్రముఖులు తీసుకున్న రెమ్యూనరేషన్లు ఏ విధంగా ఉన్నాయో తెలుసుకుందాం.
1. ఎంఎస్ ధోని (ఎంఎస్ ధోని: ది అన్టోల్డ్ స్టోరీ)
బాలీవుడ్లో తెరకెక్కిన 'ఎంఎస్ ధోని: ది అన్టోల్డ్ స్టోరీ' విజయవంతమైన బయోపిక్గా నిలిచింది. ధోని పాత్రలో దివంగత నటుడు సుశాంత్ సింగ్ రాజ్పుత్ నటించగా.. కియారా అడ్వాణీ, దిశా పటానీ నాయికలుగా కనిపించారు. నీరజ్ పాండే దర్శకత్వంలో రూపొందిన ఈ చిత్రంలో చిన్ననాటి నుంచి ధోని.. క్రికెట్పై చూపించే ఆసక్తి.. ఆ తర్వాత భారతీయ రైల్వేలో ఉద్యోగం చేస్తూ టీమ్ఇండియాలో ఏ విధంగా చోటు సంపాదించుకున్నాడనేది కథాంశం. ధోనీ వ్యక్తిగత జీవితంతో పాటు క్రికెట్ కెరీర్ గురించి స్పష్టంగా చూపించడంలో దర్శకుడు విజయం సాధించాడు. తన బయోపిక్ను నిర్మించడానికి చిత్రబృందం నుంచి ధోని రూ.45 కోట్లను తీసుకున్నాడని ఓ సర్వే తెలిపింది. అయితే ఈ వార్త అసత్యమని తెలిపిన టైమ్స్ ఆఫ్ ఇండియా.. ఈ సినిమా కోసం ధోని ఎంత పారితోషికం ఆశించాడో తెలియజేయలేదు.
ఎంఎస్ ధోని: ది అన్టోల్డ్ స్టోరీ 2. సంజయ్ దత్ (సంజు)
ప్రముఖ నటుడు సంజయ్ దత్ జీవితాధారంగా బాలీవుడ్లో రూపొందిన చిత్రం 'సంజు'. సంజయ్ దత్ పాత్ర పోషించిన రణ్బీర్ కపూర్కు విమర్శకుల నుంచి మంచి మార్కులే దక్కాయి. సంజయ్ దత్ వ్యక్తిగత జీవితంతో పాటు ఆయన సినీ ప్రయాణంలో ఎదుర్కొన్న అవరోధాలను కళ్లకు కట్టినట్టు చూపించడంలో దర్శకుడు రాజ్కుమార్ హిరాణీ విజయం సాధించాడు. అయితే ఈ బయోపిక్ కోసం తన వ్యక్తిగత సమాచారాన్ని పంచుకున్నందుకుగానూ సంజయ్ దత్ రూ.9 నుంచి 10 కోట్లను తీసుకున్నాడని టైమ్స్ ఆఫ్ ఇండియా తెలిపింది. దీనితో పాటు బాక్సాఫీస్ వద్ద వచ్చిన లాభంలో భాగం తీసుకున్నాడని స్పష్టం చేసింది.
3. మేరీ కోమ్ (మేరీకోమ్)
భారత బాక్సింగ్ క్రీడాకారిణి మేరీ కోమ్ జీవితాధారంగా రూపొందిన చిత్రం 'మేరీకోమ్'. 2008లో ప్రపంచ బాక్సింగ్ ఛాంపియన్గా నిలిచేంత వరకు ఆమె ఏ విధంగా కష్టపడిందనే విషయాన్ని వెండితెరపై దర్శకుడు ఓముంగ్ కుమార్ చక్కగా చూపించాడు. ఇందులో ప్రియాంకా చోప్రా టైటిల్ రోల్ పోషించింది. తన బయోపిక్ను రూపొందించేందుకు అనుమతి కోసం మేరీకోమ్ రూ.25 లక్షలను తీసుకున్నట్లు ఓ సర్వే తెలిపింది. ఈ సినిమాకు ఉత్తమ ఆదరణ పొందిన సినిమా విభాగంలో జాతీయ అవార్డు దక్కింది.
4. పాన్ సింగ్ తోమర్ (పాన్ సింగ్ తోమర్)
బాలీవుడ్ నటుడు ఇర్ఫాన్ఖాన్ నటించిన అత్యుత్తమ చిత్రాల్లో ఇదొకటి. పాన్ సింగ్ తోమర్ వ్యక్తిగత జీవితంతో పాటు జాతీయ స్థాయి అథ్లెట్గా ఎదగడం నుంచి చంబల్ వ్యాలీలో అత్యంత అపఖ్యాతి పొందిన దొంగగా ఎలా మారాడన్నదే ఈ చిత్ర సారాంశం. ఈ బయోపిక్ కోసం పాన్ సింగ్ తోమర్ చిత్రబృందం నుంచి రూ.15 లక్షలను తీసుకున్నట్లు మిడ్-డే సర్వే తెలిపింది. అయితే హిందూస్థాన్ టైమ్స్ ప్రకారం.. ఈ చిత్ర దర్శకుడిపై తోమర్ మేనల్లుడు టిగ్మాన్ష్ ధులియా కేసు నమోదు చేశాడని తెలుస్తోంది. సినిమా రూపొందించేందుకుగానూ రూ.40 లక్షలను చెల్లించడంలో దర్శకుడు విఫలమయ్యాడని ధులియా ఆరోపించాడు.
5. లక్ష్మీ అగర్వాల్ (ఛపాక్)
యాసిడ్ దాడి బాధితురాలైన లక్ష్మీ అగర్వాల్.. తన జీవితాధారంగా సినిమాను రూపొందించేందుకు చిత్రబృందం నుంచి రూ.13 లక్షలను తీసుకుందని ఫ్రీ ప్రెస్ జర్నల్ సర్వే వెల్లడించింది. మాలతి అని యువతి.. తనపై యాసిడ్ దాడి జరిగిన తర్వాత న్యాయం కోసం పోరాడటం సహా ఇతర యాసిడ్ బాధితురాళ్లకు మద్దతుగా న్యాయపోరాటం చేసి భారతదేశంలో యాసిడ్ అమ్మకాల విషయంలో మార్పులు తీసుకొచ్చింది.
6. మిల్కా సింగ్ (భాగ్ మిల్కా భాగ్)
మిల్కా సింగ్ను ఫ్లయింగ్ సిక్కు అని కూడా పిలుస్తారు. అతడు తన బయోపిక్ కోసం కేవలం ఒక రూపాయి వసూలు చేశాడని వెల్లడైంది. ఇందులో ఫర్హాన్ అక్తర్, సోనమ్ కపూర్లు ప్రధానపాత్రల్లో నటించారు. హిందూస్థాన్ టైమ్స్ నివేదిక ప్రకారం మిల్కా సింగ్ మాత్రమే కాకుండా మిగిలిన నటీనటులూ అతి తక్కువ పారితోషికాన్ని తీసుకున్నట్లు తెలుస్తోంది. ఈ సినిమాలోని పాత్ర కోసం సోనమ్ కపూర్ 11 రూపాయలు రెమ్యూనరేషన్ తీసుకుంది. మిల్కా సింగ్ పాత్రలో నటించిన ఫర్హాన్ అక్తర్.. "వంద మీటర్ల పరుగు కోసం 11.4 సెకన్లను తీసుకున్నా" అని వెల్లడించాడు. ఒలింపిక్స్లో మిల్కా సింగ్ పరుగు పూర్తి చేసిన సమయమిది.
