చరిత్ర ఆధారంగా భారీ బడ్జెట్తో చిత్రీకరించి.. విడుదలవుతున్న సినిమాలపై అంచనాలతో పాటు వివాదాలు పెరుగుతున్నాయి. ఇటీవల బాలీవుడ్ చిత్రం పద్మావత్ను వెంటాడిన వివాదాలు.. తాజాగాపానిపత్ను చుట్టుముట్టాయి. ప్రముఖ దర్శకుడు అశుతోష్‌ గొవారికర్... చారిత్రాత్మక నేపథ్యంలో తెరకెక్కించిన చిత్రం 'పానిపత్'. ఈ నెల 6న విడుదలైన ఈ సినిమా విమర్శలను ఎదుర్కొంటోంది. ఉత్తరాదితో పాటు మరికొన్ని ప్రదేశాల్లో ఈ చిత్ర ప్రదర్శన నిలిపివేయాలని ఒక వర్గం ప్రజలు ఆగ్రహం వ్యక్తం చేస్తున్నారు. రాజస్థాన్ రాష్ట్ర పర్యాటక శాఖ మంత్రి విశ్వేంద్ర సింగ్... 'పానిపత్'ని వెంటనే నిషేధించాలని కోరారు.
అసలు సినిమాలో ఏముంది?
మూడో పానిపత్ యుద్ధాన్ని ఆధారంగా చేసుకొని తెరకెక్కిన ఈ సినిమా మరాఠా యోధుడు సదాశివరావ్‌ భావ్‌గా అర్జున్‌ కపూర్, ఆయన భార్య పార్వతీ భాయ్‌గా కృతిసనన్, అఫ్గానిస్థాన్‌ సైన్యాధిపతి అహ్మద్‌ షా అబ్దాలి పాత్రలో సంజయ్‌ దత్‌ నటించారు. ఈ సినిమాలో జాట్‌ మహారాజా సూరజ్మాల్ పాత్రను తప్పుగా చిత్రీకరించారని.. వెంటనే ‘పానిపత్’ ప్రదర్శన నిలిపి వేయాలని కోరుతూ రాజస్థాన్‌లోని కొన్ని ప్రాంతాల్లో జాట్‌లు నిరసనలు చేపట్టారు. దర్శకుడు అశితోష్ గొవారికర్ దిష్టిబొమ్మను కూడా తగలబెట్టారు. ఈ వివాదంపై రాజస్థాన్ పర్యాటక శాఖ మంత్రి స్పందించారు.