శంకర్​కు, నాకు కొద్దిలో చావు తప్పింది: కమల్ హాసన్​

నిన్న రాత్రి జరిగిన క్రేన్ ప్రమాదంలో తను, దర్శకుడు శంకర్.. కొద్దిలో చావు నుంచి తప్పించుకున్నామన్నాడు హీరో కమల్​హాసన్. అనంతరం ఆ సంఘటన గురించి వివరించాడు.

'భారతీయుడు-2' షూటింగ్​ స్పాట్​లో బుధవారం రాత్రి జరిగిన ప్రమాదంలో, తాను కొద్దిలో చావు నుంచి తప్పించుకున్నానని హీరో కమల్​హాసన్ చెప్పాడు. చిత్రబృందంలోని ముగ్గురు సభ్యులు ఈ ఘటనలో మరణించారు. అయితే ప్రమాదాలు సునామీ వంటివని.. వాటికి ధనిక, పేద తేడా ఉండదని కమల్ అన్నాడు.

"మేం కొద్దిలో చావు నుంచి తప్పించుకున్నాం. ప్రమాదం జరగడానికి నాలుగు సెకన్ల ముందే దర్శకుడు శంకర్, కెమెరామెన్ అక్కడి నుంచి కదిలారు. ఆ ప్రదేశం దగ్గర్లోనే నేను, హీరోయిన్ కాజల్ నిలబడి ఉన్నాం" -కమల్​హాసన్, కథానాయకుడు

ఈ ప్రమాదంలో మృతి చెందిన బాధిత కుటుంబాలకు రూ.కోటి చొప్పున ఆర్థిక సాయం ప్రకటించాడు కమల్. ఇది కేవలం సహాయం మాత్రమేనని, ముందుముందు ఇలాంటివి జరగకుండా చూస్తామని చెప్పాడు. ఇది తన బాధ్యతే కాదని, చిత్ర పరిశ్రమకు చెందిన ఇతర సెలబ్రిటీలు సాయం చేస్తే బాగుంటుందని అభిప్రాయం వ్యక్తం చేశాడు.

ఇవీ చదవండి: