దేశంలో కరోనా వైరస్‌(కొవిడ్-19) నేపథ్యంలో కేంద్ర, రాష్ట్ర ప్రభుత్వాలు పటిష్ఠ చర్యలు చేపట్టాయి. కరోనా కట్టడిలో భాగంగా సినీ పరిశ్రమ కూడా తమవంతు బాధ్యతగా ఇప్పటికే పలు చిత్రాల షూటింగ్స్‌ నిలిపివేయడమే కాకుండా సినిమా విడుదల కార్యక్రమాలను కూడా వాయిదా వేశాయి. ఈ నేపథ్యంలో తాజాగా కపిల్ దేవ్ జీవితాధారంగా చేసుకుని బాలీవుడ్‌లో తెరకెక్కిన '83' మూవీ వాయిదా వేస్తున్నట్లు చిత్రబృందం ప్రకటించింది. సోషల్‌మీడియా వేదికగా ఈ విషయాన్ని తెలిపింది.
"ప్రస్తుతం కరోనా వైరస్‌ నేపథ్యంలో ప్రతిఒక్కరి ఆరోగ్యాన్ని దృష్టిలో ఉంచుకుని '83' సినిమా విడుదలను నిలిపివేస్తున్నాం. పరిస్థితులు మెరుగుపడిన తర్వాత సినిమా విడుదల విషయంపై నిర్ణయం తీసుకుంటాం. కరోనా నివారణకు తగిన జాగ్రత్తలను పాటించాలని అభిమానులకు తెలియజేస్తున్నాం. కష్టాలను ఎదుర్కొని విజయాన్ని సాధించడమే మా '83' చిత్రం. అలాగే మనం కూడా ఈ కరోనా కష్టం నుంచి త్వరలోనే బయటపడతామని ఆశిస్తున్నాం."