'ఆచార్య', 'థాంక్యూ' సినిమాలపై కరోనా ఎఫెక్ట్!

కొవిడ్ ప్రభావంతో 'ఆచార్య' షూటింగ్​ ఆపేయగా, 'థాంక్యూ' విదేశీ షెడ్యూల్​ను వాయిదా వేసినట్లు తెలుస్తోంది. ఇప్పటికే వైరస్​ బారిన పవన్​, సోనూసూద్ తదితరులు స్వీయ నిర్బంధంలో ఉండి చికిత్స తీసుకుంటున్నారు.

కరోనా సెకండ్ వేవ్​ వల్ల ప్రజలతో పాటు టాలీవుడ్​ ఇబ్బందులు ఎదుర్కొంటోంది. ఇప్పటికే పలువురు నటులు, దర్శక, నిర్మాతలు కరోనా బారిన పడటం వల్ల షూటింగ్​లు​ నిలిచిపోతున్నాయి. ఇప్పుడు ఈ జాబితాలోకి 'ఆచార్య', 'థాంక్యూ' సినిమాలు చేరాయి.

ప్రముఖ నటుడు సోనూసూద్​కు ఇటీవల కరోనా పాజిటివ్​గా తేలింది. ఈ విషయంతో పాటు ప్రస్తుత పరిస్థితుల దృష్ట్యా 'ఆచార్య' చిత్రీకరణను కొన్నాళ్లు వాయిదా వేయాలని నిర్మాత రామ్​చరణ్ భావించారట. అందుకే ప్రస్తుతం హైదరాబాద్​లో జరుగుతున్న షెడ్యూల్​ను నిలిపేయాలని నిర్ణయం తీసుకున్నట్లు తెలుస్తోంది.

నాగచైతన్య 'థాంక్యూ' టీమ్.. 15 రోజుల షెడ్యూల్​ కోసం త్వరలో ఇటలీ వెళ్లాలి. కానీ కరోనా కేసులు రోజురోజుకు పెరుగుతున్న కారణంగా దానిని వాయిదా వేసినట్లు సమాచారం. ఎప్పుడు వెళ్లేది త్వరలో స్పష్టత ఇవ్వనున్నారు. ఇందులో రాశీఖన్నా, మాళవిక నాయర్, అవికాగోర్ హీరోయిన్లు. విక్రమ్ కె కుమార్ దర్శకత్వం వహిస్తున్నారు.