Case on Vicky Kaushal: నకిలీ నంబర్ ప్లేట్తో బైక్ను వాడినందుకు బాలీవుడ్ యాక్టర్ విక్కీ కౌశల్ నటిస్తున్న 'లుకా చుప్పీ 2' సినిమా నిర్మాణ సంస్థపై కేసు నమోదైంది. షూటింగ్లో భాగంగా విక్కీ కౌశల్.. హీరోయిన్ సారా అలీఖాన్ను బైక్పై ఎక్కించుకుని మధ్యప్రదేశ్ ఇండోర్లో షికార్లు కొట్టారు. ఈ వీడియో సామాజిక మాధ్యమాల్లో వైరల్గా మారింది. అయితే.. విక్కీ వినియోగించిన బైక్ నంబర్ నకిలీదని తేలింది.
విక్కీ బైక్ రైడ్ వీడియో చూసిన నంబర్ ప్లేట్ రియల్ ఓనర్, ఇండోర్కు చెందిన జైసింగ్ యాదవ్ షాక్కు గురయ్యారు. 'MP-09 UL 4872' నంబర్ గల తన స్కూటీ నంబర్ విక్కీ బైక్కు ఉందని నిర్ధరించుకుని పోలీసులను సంప్రదించారు. ఈ విషయాన్ని వారికి తెలిపారు. తన నంబర్ ప్లేట్తో నకిలీ నంబర్ను ఉపయోగిస్తున్నారని ఫిర్యాదు చేశారు. ఆ నంబర్ వినియోగిస్తున్న వాహనం వల్ల ఎవరైనా ప్రమాదానికి కారణమైతే తాను బాధ్యత వహించాల్సి ఉంటుందని ఆందోళన చెందారు. కేసు నమోదు చేసిన పోలీసులు.. దర్యాప్తు చేపట్టారు. ఒకే నంబర్ ప్లేట్ను రెండు వాహనాలకు ఉపయోగించకూడదని తెలిపారు.