రైతు కుటుంబానికి సోనూసూద్ సాయం​

ఆంధ్రప్రదేశ్​లోని ఓ రైతు కుటుంబానికి అండగా నిలిచిన సోనూసూద్.. ఎద్దులు కొనిస్తానని హామీ ఇచ్చారు. కాడి మోస్తున్న అమ్మాయిల్ని చదుకోనివ్వాలని ట్వీట్ చేశారు.

ఆంధ్రప్రదేశ్​ చిత్తూరు జిల్లాలోని మదనపల్లెలో హృదయ విదారక ఘటన వెలుగులోకి వచ్చింది. పొలం దున్నడానికి ఎద్దులను అద్దెకు తీసుకునేందుకు స్థోమత లేక.. తన కుమార్తెలతో కాడి మోయించిన వీడియో అందరి మనసులను కదిలించింది. ఈ విషయాన్ని ఓ రిపోర్టర్​ ట్విట్టర్​ వేదికగా పంచుకున్నారు. కరోనాతో భారీ నష్టాల్లో కూరుకుపోయి చేతిలో చిల్లిగవ్వ అయినా లేకపోవడం వల్లే ఈ విధంగా చేయాల్సి వచ్చిందని ఆ రైతు గోడు విన్నవించుకున్నాడు.

ఈ విషయంపై తాజాగా స్పందించిననటుడు​ సోనూసూద్.. ఆ​ రైతు కుటుంబానికి అండగా ఉంటానని హామీ ఇచ్చారు. సోమవారం(జులై 27) ఉదయం అయ్యేసరికి వారి ఇంటి ముందు ఎద్దుల జత ఉంటుందని ట్వీట్ చేశారు. బాలికలను చదువుపై దృష్టి పెట్టనివ్వాలని తెలిపారు.

లాక్​డౌన్​ కారణంగా పలు ఊళ్లలో చిక్కుకున్న వేలాది మంది వలస కూలీలకు ఇప్పటికే సాయంగా చేశారు సోనూసూద్. వారిని స్వస్థలాలకు చేర్చుతూ కూలీల పాలిట దైవంగా మారారు. దీంతో సామాజిక మాధ్యమాల వేదికగా ఆయనపై ప్రశంసలు వస్తూనే ఉన్నాయి.