కల్యాణ్ రామ్(Kalyan Ram) ప్రధానపాత్రలో నటిస్తున్న 'బింబిసార'(Bimbisara) భారీ బడ్జెట్‌తో తెరకెక్కుతోంది. ఈ చిత్రానికి వశిష్ట్‌ దర్శకత్వం వహిస్తున్నారు. మగధ సామ్రాజ్యంలోని హర్యంక రాజవంశ రాజు బింబిసారుడి జీవితం ఆధారంగా ఈ చిత్రం తెరకెక్కుతోంది. కేథరిన్‌, సంయుక్త మేనన్‌ హీరోయిన్లు. ఇప్పటికే విడుదల చేసిన టైటిల్ మోషన్ పోస్టర్ ప్రేక్షకుల్ని ఆకట్టుకుంది. తాజాగా ఈ సినిమాకు సంబంధించిన ఓ వార్త సినీ వర్గాల్లో చర్చనీయాంశంగా మారింది. అదేంటంటే.. ఈ చిత్రాన్ని మూడు భాగాలుగా తెరకెక్కించనున్నారట.
తొలుత ఒక భాగంలోనే కథ మొత్తం వివరించాలని భావించినా.. మూడు భాగాల్లో అయితే బాగుంటుందని దర్శక-నిర్మాతలు భావించినట్లు తెలుస్తోంది. అలా అయితే కథకు న్యాయం చేయగలమనే ఆలోచనలో ఉందట చిత్రబృందం. అందుకోసం స్క్రిప్టు పనులు జరుగుతున్నాయట. ఈ సినిమాకు చిరంతన్‌ భట్‌ సంగీతం సమకూర్చనున్నారు. ఎన్టీఆర్ ఆర్ట్స్‌ సమర్పణలో ఈ చిత్రాన్ని కె.హరికృష్ణ నిర్మిస్తున్నారు.