ఒత్తిడి తట్టుకోలేక, అవకాశాలు రాకపోవడం వల్ల తాను ఒకానొక సమయంలో ఆత్మహత్య చేసుకోవాలనుకున్నట్లు చెప్పింది బిగ్బాస్ ఫేమ్, నటి నందినిరాయ్. ఇటీవలే బాలీవుడ్ నటుడు సుశాంత్ సింగ్ సుసైడ్ చేసుకుని మృతి చెందిన నేపథ్యంలో ఓ ఇంటర్వ్యూలో మాట్లాడుతూ తన డిప్రెషన్కు సంబంధించిన విషయాల్ని పంచుకుంది.
"2011లో ఇండస్ట్రీలోకి వచ్చాను. 2015లో 'మోసగాళ్లకు మోసగాడు'లో హీరోయిన్గా అవకాశమొచ్చింది. అయితే ఆ సినిమా పరాజయం పాలవడం వల్ల పూర్తిగా నిరాశచెందాను. దీంతో డిప్రెషన్లోకి వెళ్లిపోయాను. ఒకానొక సమయంలో ఇంటి టెర్రస్పై నుంచి దూకి ఆత్మహత్య చేసుకోవాలని ప్రయత్నించాను. దాదాపు రెండేళ్లపాటు మానసిక ఒత్తిడిని అనుభవించాను. అయితే బిగ్బాస్ రెండో సీజన్లో పాల్గొని వచ్చిన తర్వాత నన్ను నేను దృఢంగా మార్చుకున్నాను. స్నేహితులతో రోజూ మాట్లాడుతూ ఉండేదాన్ని. డాక్టర్ల దగ్గర కౌన్స్లింగ్లకు హాజరయ్యేదాన్ని. ఇలా ఈ సమస్య నుంచి బయటపడ్డాను" -నందిని రాయ్, నటి