ప్రభాస్​తో మహానటి దర్శకుడి కొత్త చిత్రం

అలనాటి తార సావిత్రి జీవితాన్ని 'మహానటి'గా తెరకెక్కించి ప్రశంసలు అందుకున్న యువ దర్శకుడు నాగ్​ అశ్విన్. ఈ స్టార్​ డైరెక్టర్​ యంగ్​ రెబల్​ స్టార్​ ప్రభాస్​తో త్వరలో ఓ సినిమా చేసేందుకు సిద్ధమవుతున్నాడు. నేడు ఈ విషయాన్ని అధికారికంగా ప్రకటించింది నిర్మాణ సంస్థ వైజయంతి మూవీస్​.

యంగ్​ రెబల్​స్టార్​ ప్రభాస్​, డైరెక్టర్​ నాగ్​ అశ్విన్​.. కలిసి ప్రతిష్టాత్మక ప్రాజెక్టుకు సిద్ధమయ్యారు. ప్రముఖ నిర్మాణ సంస్థ వైజయంతి మూవీస్​​ త్వరలో 50 ఏళ్లు పూర్తి చేసుకోనున్న సందర్భంగా ఈ ప్రాజెక్టుకు శ్రీకారం చుట్టనుంది. నేడు ఈ విషయంపై అధికారిక ప్రకటన చేసింది. భారీ సైన్స్​ ఫిక్షన్​ నేపథ్యంలో ఈ సినిమా తెరకెక్కనున్నట్లు సమాచారం.

ప్ర‌స్తుతం 'జిల్' ఫేం రాధాకృష్ణ ద‌ర్శ‌క‌త్వంలో ఓ సినిమా చేస్తున్న డార్లింగ్​.. త్వ‌ర‌లోనే నాగ్ అశ్విన్ బృందంతో కలిసి పనిచేయనున్నాడు. రాధాకృష్ణ సినిమాలో పూజా హెగ్డే కథానాయిక. ఈ సినిమాకు 'రాధే శ్యాం', 'ఓ డియర్', అనే టైటిల్స్ పరిశీలనలో ఉన్నాయి. 1930 నాటి ప్రేమ కథ నేపథ్యంలో కథాంశం ఉండబోతోందని వార్తలు వినిపిస్తున్నాయి.

గతంలో అశ్విన్ ద‌ర్శ‌క‌త్వంలో తెర‌కెక్కిన 'మ‌హాన‌టి' చిత్రం విమర్శకుల ప్రశంసలూ అందుకుంది. అశ్వినీద‌త్ నిర్మించ‌గా, ఈ చిత్రంలో న‌టించిన కీర్తి సురేష్ జాతీయ అవార్డు ద‌క్కించుకుంది. వైజ‌యంతి సంస్థ 'మ‌హ‌ర్షి' సినిమాతో గతేడాది భారీ హిట్టు అందుకుంది.