Balakrishna Akhanda movie: నందమూరి బాలకృష్ణ 'అఖండ'.. బాక్సాఫీస్ దగ్గర అదరగొట్టేసింది. గతేడాది డిసెంబరులో వచ్చిన ఈ సినిమా.. వసూళ్లలో సరికొత్త రికార్డు సృష్టించింది. సరిగ్గా ఇదే సమయంలో ఓటీటీలోనూ 'అన్స్టాపబుల్' టాక్ షో హోస్ట్గా బాలయ్య దుమ్మురేపారు. తనదైన మార్క్ టైమింగ్, పంచులతో ఆకట్టుకున్నారు. ఈ క్రమంలోనే రాబోయే సినిమాలకు బాలయ్య తన రెమ్యూనరేషన్ను పెంచేసినట్లు తెలుస్తోంది.
'అన్స్టాపబుల్ విత్ ఎన్బీకే' ప్రస్తుత సీజన్లో బాలయ్య ఒక్కో ఎపిసోడ్ కోసం దాదాపు రూ.40 లక్షలకుపైగానే తీసుకుంటున్నారట. దీంతో మొత్తం 12 ఎపిసోడ్లు పూర్తిచేసేసరికి ఆయన దాదాపు రూ.6 కోట్లు ఆర్జించనున్నారని సమాచారం. ఈ మొత్తం 'అఖండ' కోసం బాలయ్య తీసుకున్న రెమ్యూనరేషన్లో సగం!
ఇప్పుడు దర్శకుడు గోపీచంద్ మలినేనితో చేయబోయే సినిమా కోసం సరికొత్తగా సిద్ధమవుతున్న బాలయ్య.. దాదాపు రూ.20 కోట్ల రెమ్యూనరేషన్ తీసుకోనున్నారట. ఆ తర్వాత చేయబోయే సినిమాలకూ ఇంతే మొత్తం అందుకోనున్నట్లు తెలుస్తోంది.