కొన్ని విషయాల్ని కొందరు బలంగా నమ్ముతారు. వాటి వల్ల వారికి కెరీర్ పరంగానైనా, జీవితంలోనైనా కలిసిరావొచ్చు. నటసింహం నందమూరి బాలకృష్టకు ఇలాంటి సెంటిమెంట్లు కాస్త ఎక్కువే అని దగ్గరగా చూసిన వారు చెబుతుంటారు. అలాంటి ఓ సెంటిమెంటుకు సంబంధించి ఆసక్తికర విషయం వెలుగులోకి వచ్చింది. అదే "రూమ్ నంబర్ 610".
ఏంటీ రూమ్ నంబర్ 610?
అగ్ర హీరోల సినిమాలంటే రామోజీ ఫిల్మ్ సిటీలో చిత్రీకరణ జరగాల్సిందే. షూటింగ్ సమయంలో నటులు చాలా మంది ఫిల్మ్ సిటీలోనే బస చేస్తుంటారు. అది కూడా ఫైవ్ స్టార్ హోటల్ సితారలో. కానీ బాలయ్య మాత్రం ఇందుకు భిన్నం. ఆయన ఆ హోటల్లో ఉండడట. పక్కనే ఉన్న త్రీ స్టార్ హోటల్ తారలో మాత్రమే బస చేస్తాడు. అది కూడా 610వ నంబర్ గదిలో మాత్రమే.
బాలయ్య వచ్చే సమయానికి ఆ రూమ్లో ఎవరైనా ఉంటే... వెంటనే ఖాళీ చేయాల్సిందే. ఈ విషయాలన్నీ రామోజీ ఫిల్మ్ సిటీ ఎగ్జిక్యూటివ్ షెఫ్ శివ చెప్పారు. ఎప్పుడూ దక్షిణాది భోజనాన్నే బాలయ్య ఇష్టపడతారని వెల్లడించారు. స్ట్రీట్బైట్ అనే యూట్యూబ్ ఛానెల్లో చేసిన ఓ వీడియోలో ఈ ఆసక్తికర సంగతుల్ని పంచుకున్నారు.
ప్రస్తుతం బాలకృష్ణ... బోయపాటి శ్రీను దర్శకత్వంలో నటిస్తున్నాడు. ఈనెల 2 నుంచి షూటింగ్ ప్రారంభమై, ఇటీవలే తొలి షెడ్యూల్ పూర్తి చేసుకుంది. వీరిద్దరి కాంబినేషన్లో తెరకెక్కుతున్న మూడో చిత్రమిది. ఇంతకు ముందు 'సింహా', 'లెజెండ్' సినిమాలతో హిట్లు అందుకున్నారు. ఇప్పుడు హ్యాట్రిక్ కొట్టేందుకు సిద్ధమవుతున్నారు.