బాలయ్య-బోయపాటి సినిమాపై వీడని ఉత్కంఠ!

బాలకృష్ణ - బోయపాటి కాంబినేషన్​లో రూపొందే కొత్త సినిమా ఆగిపోయిందనే వార్తలు వస్తున్నాయి. బడ్జెట్​లో కోతలు పడుతుండడం వల్ల ఆలస్యం అయ్యే అవకాశం ఉందని అంటున్నారు. అయితే ఈ విషయంపై చిత్రబృందం ఇప్పటివరకు ఎలాంటి ప్రకటన ఇవ్వలేదు.

నందమూరి బాలకృష్ణ.. 'జై సింహ' తర్వాత కేఎస్​ రవికుమార్​ కాంబినేషన్​లో వచ్చిన చిత్రం 'రూలర్​'. ఈ సినిమా బాక్సాఫీస్​ వద్ద అనుకున్నంతగా రాణించలేకపోయింది. ఈ ప్రభావం బాలయ్య కొత్త ప్రాజెక్టుపై పడిందని సినీ వర్గాల్లో టాక్.

'రూలర్​' ప్రభావం పడినట్లేనా

బాలయ్య 106వ చిత్రానికి మిర్యాల రవీందర్ నిర్మాత.​ దాదాపు రూ.70 కోట్ల బడ్జెట్​ నిర్ణయించినట్లు ఆ మధ్య వార్తలొచ్చాయి. అయితే 'రూలర్​' ఫలితం చూసిన ఆయన.. అంత బడ్జెట్​ పెట్టేందుకు వెనుకాడుతున్నాడట. బాలకృష్ణ-బోయపాటిలకు పారితోషికం ఇవ్వకుండా లాభాల్లో వాటా ఇవ్వాలని నిర్ణయించారట. ఈ విషయమై ఇప్పటికే ఇరువురితో చర్చలు జరిపారట.

బోయపాటికి సలహాలు

బడ్జెట్​ను పూర్తిగా కుదించేలా స్క్రిప్ట్​లో మార్పులు చేయాలని​ బోయపాటికి సలహా ఇచ్చారట రవీందర్. వీటన్నింటికీ సరే అంటేనే ఈ ప్రాజెక్టు పట్టాలెక్కుతుందని, లేదంటే దీని నుంచి తప్పుకుంటానని తేల్చిచెప్పినట్లు వార్తలొస్తున్నాయి.

మరి ఈ వార్తలో నిజమెంత? అసలు ఈ చిత్రం ఉంటుందా? లేదా? అన్న అనుమానాలపై స్పష్టత రావాలంటే చిత్రబృందం నుంచి అధికారిక ప్రకటన వచ్చే వరకు వేచి చూడక తప్పదు.

ఇదీ చదవండి: రివ్యూ 2019: చెలరేగిన చిన్న సినిమాలు.. మెప్పించిన మల్టీస్టారర్లు