ప్రఖ్యాత రాయల్​ హాల్​లో 'బాహుబలి'

తెలుగు సినీ పరిశ్రమ ఖ్యాతిని ప్రపంచానికి చాటిచెప్పిన సినిమా 'బాహుబలి.' ఈ సిరీస్​లోని రెండు సినిమాలు బాక్సాఫీస్​ వద్ద కాసుల వర్షం కురిపించడమే కాకుండా ప్రేక్షకులను అబ్బురపరిచాయి. మరోసారి ఈ చిత్రం అరుదైన అవకాశాన్ని దక్కించుకుంది. లండన్​లోని ప్రఖ్యాత రాయల్​ ఆల్బర్ట్​ హాల్​లో ప్రదర్శనకు ఛాన్స్​ కొట్టేసింది.

తెలుగు తెరపైనే కాకుండా పలు భాషల్లో ఘన విజయం సాధించిన 'బాహుబలి' మరోసారి ప్రపంచ ప్రఖ్యాత వేదికపై ప్రదర్శనకు సిద్ధమవుతోంది. ఎన్నో ఫిల్మ్​ ఫెస్టివల్స్​లో ప్రముఖులతో ఔరా అనిపించిన జక్కన్న చిత్రం... ప్రఖ్యాత రాయల్​ ఆల్బర్ట్​ హాల్​లోనూ కనువిందు చేయనుంది.

లండన్‌లోని ఈ ప్రముఖ కాన్సర్ట్​ హాల్​లో బాహుబలి సినిమా వరల్డ్‌ ప్రీమియర్‌ లైవ్‌ను నిర్వహించబోతున్నారు. దీనికి చిత్ర బృందం కూడా హాజరు కాబోతోంది. రాజమౌళి, ఎమ్‌.ఎమ్‌. కీరవాణి, ప్రభాస్‌, రానా, అనుష్క... ప్రముఖులతో కలిసి సినిమా వీక్షించనున్నారు. 'బాహుబలి: ది బిగినింగ్‌' ప్రీమియర్‌ అక్టోబరు 19న సాయంత్రం 7 గంటలకు ప్రదర్శించనున్నారు. ఈ మేరకు ప్రేక్షకుల కోసం టికెట్లను కూడా రాయల్‌ ఆల్బర్ట్‌ హాల్‌ తమ వెబ్‌సైట్‌లో బుకింగ్‌కు ఉంచింది. ఈ హాల్​లో ప్రదర్శించనున్న తొలి దక్షిణాసియా చిత్రం బాహుబలి.

విలాసవంతమైన హాలు​...

లండన్‌లో ఎంతో ప్రాచుర్యం పొందిన ఈ కాన్సర్ట్‌ హాలులో 1941 నుంచి ప్రదర్శనలు నిర్వహిస్తున్నారు. అతి విలాసవంతమైన ఈ థియేటర్​లో మొత్తం 5వేల 272 మంది కూర్చునేందుకు వీలుంది. ప్రధాన ఆడిటోరియంలో ప్రతి ఏడాది దాదాపు 390 షోలను నిర్వహిస్తుంటారు. సంగీత కార్యక్రమాలతో పాటు సినిమాల్ని కూడా ఇక్కడ ప్రదర్శిస్తుంటారు.