'ఇళయ దళపతి' విజయ్ కథానాయకుడిగా లోకేశ్ కనకరాజు దర్శకత్వంలో తెరకెక్కుతున్న యాక్షన్‌ థ్రిల్లర్‌ 'మాస్టర్'. ఆండ్రియా, మాళవిక మోహనన్ కథానాయికలు. విజయ్ సేతపతి ప్రతినాయకుడిగా నటిస్తున్నాడు. శరవేగంగా చిత్రీకరణ జరుపుకొంటున్న ఈ సినిమాలో.. విజయ్ ఆలపించిన 'కుట్టి స్టోరీ' పాట లిరికల్ వీడియోను చిత్ర బృందం విడుదల చేసింది. ఇది విడుదలైన దాదాపు 6 గంటల్లోనే 5 మిలియన్ల వీక్షణలు సొంతం చేసుకుంది.
అనిరుధ్ రవిచంద్రన్‌ స్వరాలకు అనురాజా కామరాజ్‌ సాహిత్యం అందించాడు. ప్రస్తుతం ఈ పాట సోషల్‌ మీడియాలో ట్రెండింగ్లో ఉంది. అంతేకాదు, ఈ లిరికల్ వీడియోను డిజైన్‌ చేసిన విధానమూ ఆకట్టుకుంటోంది. అనిరుధ్ 'వై దిస్‌ కోలవెరి'ని గుర్తు చేస్తోంది. వేసవి కానుకగా ఏప్రిల్‌ 9న సినిమాను విడుదల చేసేందుకు చిత్రబృందం సన్నాహాలు చేస్తోంది.