'అంధాధున్​'కు నాలుగు ఐఫా అవార్డులు

ఐఫా​ రాక్స్​ 20వ ఎడిషన్​లో బాలీవుడ్​ సినిమా 'అంధాధున్​' సత్తా చాటింది. ఇప్పటికే ఉత్తమ హిందీ చిత్రంగా జాతీయ అవార్డు పొందిన ఈ సినిమా... తాజాగా సాంకేతిక విభాగాల్లో నాలుగు పురస్కారాలు సొంతం చేసుకుంది.

జాతీయ అవార్డు పొందిన 'అంధాధున్​' సాంకేతిక విభాగాల్లో నాలుగు పురస్కారాలు గెల్చుకుంది. సోమవారం జరిగిన ఈ వేడుకకు బాలీవుడ్​ తారాగణం హాజరైంది. ప్రధాన అవార్డుల కార్యక్రమం సెప్టెంబర్​ 18న ముంబయిలో జరగనుంది. తొలిసారి భారత్​లో ఈ కార్యక్రమం నిర్వహిస్తుడటం వల్ల ఈ వేడుకపై ఆసక్తి ఏర్పడింది.

వివిధ కేటగిరీలు - విజేతలు...

1. సినిమాటోగ్రఫీ: సుధీప్​ ఛటర్జీ(పద్మావత్​)
2. స్క్రీన్​ప్లే: శ్రీరామ్​ రాఘవన్​, అర్జిత్​ బిస్వాస్​, పూజా లదా శృతి , యోగేశ్​ చంద్రశేఖర్​, హేమంత్​ రావ్​(అంధాధున్​)
3. డైలాగులు: అక్షత్​ గిల్దియల్​(బాదాయి హో)
4. ఎడిటింగ్:​ పూజా లదా శృతి(అంధాధున్​)
5. కొరియోగ్రఫీ: కృతి మహేశ్​, జ్యోతి తోమర్​(పద్మావత్​ చిత్రంలోని 'ఘూమర్'​ పాటకు)
6. సౌండ్​ డిజైన్​: కృనాల్​ శర్మ(తుంబాడ్​)
7. సౌండ్​ మిక్సింగ్:​ అజయ్​ కుమార్​(అంధాధున్​)
8. నేపథ్య సంగీతం:​ డేనియల్​(అంధాధున్​)
9. స్పెషల్​ ఎఫెక్ట్స్​​: ఫిల్మ్​గేట్​ ఫిల్మ్స్​​(తుంబాడ్​)

ఐఫా రాక్స్​ వేడుకకు ప్రముఖ నటులు రాధికా ఆప్టే, అలీ ఫజల్​ వ్యాఖ్యాతలుగా వ్యవహరించారు. అమిత్​ త్రివేది, సలీమ్​ సులేమాన్​, నేహా కక్కర్​, జస్సీ గిల్​, ప్రాక్​, ధ్వని భనుషాలి, రంజిత్​, జొనిత, నకాశ్​ అజీజ్​, కుట్లే ఖాన్​, తులసీ కుమార్​ ఈ కార్యక్రమంలో తమ ప్రదర్శనలతో అలరింపజేశారు. అర్జున్​ రాం​పాల్​, రకుల్​ ప్రీత్​, అపరశక్తి ప్రధానాకర్షణగా నిలిచారు.

తొలిసారి భారత్​లో...

బుధవారం జరగనున్న ప్రధాన వేడుకకు కార్తిక్​ ఆర్యన్​, ఆయుష్మాన్​ ఖురానా వ్యాఖ్యాతలు. ఇందులో సల్మాన్​ఖాన్​, మాధురీ దీక్షిత్​, రణ్​వీర్​ సింగ్​, కత్రినా కైఫ్​, విక్కీ కౌశల్​, సారా అలీఖాన్​ ప్రత్యేక ప్రదర్శనలు ఇవ్వనున్నారు. 2000 నుంచి ప్రారంభమైన ఈ అవార్డుల కార్యక్రమం.. 20 ఏళ్లుగా 12 దేశాల్లో నిర్వహించారు. మొదటిసారి ఈ ఏడాది భారత్​లో జరగనుంది.

ఇదీ చదవండి...

• 'విక్రమ్​ను చూశారా?'... చంద్రయాన్​-2పై బ్రాడ్​పిట్ ఆరా