కష్టకాలంలో గతాన్ని గుర్తుచేసుకున్న బిగ్​బీ

కరోనా కేసులు పెరుగుతోన్న నేపథ్యంలో మహారాష్ట్రలో రాత్రిపూట కర్ఫ్యూపై బిగ్​బీ అమితాబ్​ స్పందించారు. ఈ నిబంధనల వల్ల పనులన్నీ నిలిచిపోతున్నాయని ఆవేదన వ్యక్తం చేశారు. పరిస్థితులు నిదానంగా తిరిగి పుంజుకుంటాయని భావిస్తున్నట్లు ఆయన తెలిపారు.

బాలీవుడ్‌ మెగాస్టార్‌ అమితాబ్‌ బచ్చన్‌ 1970ల కాలాన్ని గుర్తు చేసుకున్నారు. కరోనా కేసులు పెరుగుతున్న నేపథ్యంలో మహారాష్ట్రలో రాత్రిపూట నిబంధనలు విధించడంపై అమితాబ్‌ స్పందించారు. ఈ నిబంధనల వల్ల పనులన్నీ ఎక్కడివక్కడే నిలిచిపోతాయన్నారు. సినిమా షెడ్యూళ్లు తీవ్రంగా ప్రభావితమవుతాయని.. అయినా.. ఆ తర్వాత నిదానంగా తిరిగి పుంజుకుంటాయని ఆశాభావం వ్యక్తం చేశారు. కానీ.. రోజువారి పని చేసుకొని బతికే కార్మికుల గురించి ఆలోచిస్తుంటేనే ఆవేదనగా ఉందన్నారు అమితాబ్.

ఈ మేరకు ఆయన తన సోషల్‌ మీడియాలో తన పాత ఫొటోలు పంచుకున్నారు. 1970ల్లో సంవత్సరానికి కేవలం 6 నుంచి 7 సినిమాలు మాత్రమే విడుదలయ్యేవి. 50 నుంచి 100 వారాల పాటు అలరించేవి. ఇప్పుడు విజయాలను ఓటీటీలే నిర్ధారిస్తున్నాయని బిగ్‌బీ అన్నారు.