'బిగ్​ బీ' కామెడీ పంచ్​లకు మీరు సిద్ధమా..?

బాలీవుడ్ దర్శకుడు షూజిత్ సర్కార్ తీస్తున్న కొత్త చిత్రంలో అమితాబ్ బచ్చన్, ఆయుష్మాన్ ఖురానా తొలిసారిగా కలిసి నటించనున్నారు. వచ్చే నెల షూటింగ్ ప్రారంభం కానుంది.

బిగ్​ బీ అమితాబ్ బచ్చన్ ఫుల్ జోష్ మీద ఉన్నారు. ఏడు పదుల వయసులోనూ ఆగకుండా సినిమాలు చేస్తున్నారు. తాజాగా మరో చిత్రం చేసేందుకు అంగీకరించారు. బాలీవుడ్ యువ కథానాయకుడు ఆయుష్మాన్ ఖురానాతో కలిసి తెరను పంచుకోనున్నారు. వీరిద్దరూ కలిసి నటిస్తుండటం ఇదే తొలిసారి.

షూజిత్ సర్కార్ తెరకెక్కిస్తున్న ఈ సినిమాకు 'గులాబో సితాబో' టైటిల్​ ఫిక్స్ చేశారు. ఇంతకుముందు ఆయుష్మాన్​తో విక్కీ డోనర్(2012), అమితాబ్​తో పీకూ(2015) చిత్రాలను తీశాడీ దర్శకుడు. ఈ రెండింటికీ రచయితగా పనిచేసిన జూహీ చతుర్వేది.. ఈ సినిమాకు కథ అందిస్తోంది.

పూర్తి స్థాయి కామెడీ కథాంశంతో రానున్న సినిమా షూటింగ్ వచ్చే నెల ప్రారంభం కానుంది. ఈ ఏడాది నవంబరులో చిత్రాన్ని విడుదల చేయనున్నారు.