దుశ్యంతుడి పాత్ర పూర్తి.. 'పుష్ప' ఆల్ ఇండియా రికార్డు

గుణశేఖర్ దర్శకత్వంలో రూపొందుతున్న 'శాకుంతలం' సినిమాలో దుశ్యంతుడి పాత్ర చిత్రీకరణ పూర్తయింది. అలాగే అల్లు అర్జున్ 'పుష్ప'లోని 'దాక్కో దాక్కో' సాంగ్ రికార్డుల పరంపర కొనసాగుతోంది.

అల్లు అర్జున్ హీరోగా సుకుమార్ దర్శకత్వంలో తెరకెక్కుతున్న పాన్ ఇండియా మూవీ 'పుష్ప'. ఇటీవలే ఈ సినిమా నుంచి 'దాక్కో దాక్కో మేక' అనే పాటను విడుదల చేసింది చిత్రబృందం. తెలుగుతోపాటు తమిళం, మలయాళం, కన్నడ, హిందీలోనూ ఈ సాంగ్​ను రిలీజ్ చేశారు. అప్పటి నుంచి యూట్యూబ్​లో ట్రెండింగ్​లో నిలిచి రికార్డు సృష్టించిందీ పాట. 11 రోజుల నుంచి ఈ పాట నాలుగు భాషల్లో ట్రెండింగ్​లో కొనసాగుతోంది. ఇది భారతీయ సినీ చరిత్రలోనే మొదటిసారి అంటూ ఆనందాన్ని వ్యక్తం చేసింది చిత్రబృందం. ఈ సినిమలో రష్మిక హీరోయిన్​గా నటిస్తుండగా దేవిశ్రీప్రసాద్ సంగీతం అందిస్తున్నాడు.

'శాకుంతలం' అప్​డేట్

సమంత, దేవ్ మోహన్ ప్రధాన పాత్రల్లో గుణశేఖర్ దర్శకత్వం వహిస్తున్న చిత్రం 'శాకుంతలం'. గుణ టీమ్ వర్క్స్ పతాకంపై నీలిమా గుణ ఈ చిత్రాన్ని నిర్మిస్తోంది. చిత్రీకరణ తుది దశకు చేరుకున్న ఈ చిత్రంలో దేవ్ మోహన్ దుశ్యంతుడి పాత్రలో నటించారు. తన పాత్రకు సంబంధించిన చిత్రీకరణ ముగియడం వల్ల దర్శక నిర్మాతలు దేవ్ మోహన్​కు ప్రత్యేక కృతజ్ఞతలు తెలుపుతూ కేక్ కట్ చేయించారు. ఈ సందర్భంగా యూనిట్ సభ్యుల మధ్య దేవ్ మోహన్ తన ఆనందాన్ని పంచుకున్నారు. దేవ్ చేసిన దుశ్యంతుడి పాత్ర ప్రేక్షకులను మంత్రముగ్దులను చేస్తుందని గుణశేఖర్ బృందం తెలిపింది.