Allu Arjun bollywood debut: 'గంగోత్రి' సినిమాతో పరిచయమైన అల్లు అర్జున్.. 'ఆర్య', 'దేశ ముదురు', 'జులాయి', 'అల వైకుంఠపురము'లో వంటి హిట్ చిత్రాలతో స్టార్ హీరోగా ఎదిగారు. తెలుగులో విపరీతమైన క్రేజ్ ఉన్న బన్నీకి మలయాళం సహా ఇతర దక్షిణాది భాషల్లోనూ అభిమానులున్నారు. డబ్బింగ్ సినిమాల ద్వారా హిందీ ప్రేక్షకులకూ దగ్గరయ్యాడు ఐకాన్ స్టార్. దీంతో ఉత్తరాది అభిమానులు బన్నీ స్ట్రెయిట్ చిత్రం కోసం ఎదురుచూస్తున్నారు.
ఈ క్రమంలోనే బాలీవుడ్ ఎంట్రీపై స్పందించారు అల్లు అర్జున్. ఇటీవలే ఓ హిందీ సినిమా ఆఫర్ వచ్చిందని తెలిపారు. అయితే హిందీలో తన అరంగేట్రం కోసం అక్కడి ప్రేక్షకులు మరి కొన్ని రోజులు వేచిచూడక తప్పదని అన్నారు.
"నాకు హిందీ నుంచి ఓ ఆఫర్ వచ్చింది. కానీ అదంత ఎగ్జైటింగ్గా అనిపించలేదు. త్వరలోనే అది (బాలీవుడ్ ఎంట్రీ) జరుగుతుందని ఆశిస్తున్నా. వేరే ఇండస్ట్రీలో పనిచేయడానికి ఎంతో ధైర్యం, తెగువ కావాలి."
-అల్లు అర్జున్, నటుడు