తన ముద్దుల కూతురు అల్లు అర్హ నటన చూసి అల్లు అర్జున్ దంపతులు మురిసిపోయారు. డైరెక్టర్‌ గుణశేఖర్ దర్శకత్వంలో తెరకెక్కుతున్న 'శాకుంతలం' చిత్రంలో అర్హ నటిస్తుంది. గతంలో గుణశేఖర్ రూపొందించిన 'రుద్రమదేవి'లో బన్నీ 'గోన గన్నారెడ్డి'గా కనిపించి సందడి చేశాడు. ఇప్పుడు ఆ డైరెక్టర్‌ చిత్రంలోనే బన్నీ తనయ అర్హ నటిస్తోంది. ఈ చిత్రంలో అక్కినేని సమంత ప్రధాన పాత్ర పోషిస్తుండగా.. ఓ కీలకపాత్రలో అర్హ కనిపించనుంది. ప్రస్తుతం ఈ సినిమా షూటింగ్‌ హైదరాబాద్‌లో జరుగుతోంది.
కాగా.. తన కూతురి నటన దగ్గరుండి చూడాలని బన్నీ-స్నేహ దంపతులు 'శాకుంతలం' సెట్కు వెళ్లారు. ఈ క్రమంలోనే అర్హ నటన చూసిన బన్నీ తెగ మురిసిపోయాడు. ఆ ఫొటోలు ఇంటర్నెట్‌లో చక్కర్లు కొడుతున్నాయి. అంతేకాదు.. బన్నీ సినిమాల కోసం వినియోగించే వాహనం 'ఫాల్కనో'ను కూతురి సౌకర్యం కోసం కేటాయించినట్లు తెలుస్తోంది. ఈ సినిమాను దిల్‌ సమర్పణలో దిల్‌ రాజు ప్రొడక్షన్స్‌, గుణాటీమ్‌ వర్క్స్‌ పతాకాలపై దిల్‌రాజు, నీలిమ గుణ సంయుక్తంగా నిర్మిస్తున్నారు. భారీ బడ్జెట్‌తో తెరకెక్కనున్న ఈ సినిమా పాన్‌ ఇండియా స్థాయిలో అలరించేందుకు సిద్ధమవుతోంది.