లాక్డౌన్ సడలింపుల్లో భాగంగా ఈనెల 15 నుంచి థియేటర్లు ఓపెన్ చేసుకోవడానికి అనుమతించింది కేంద్ర ప్రభుత్వం. దీంతో తమ చిత్రాల విడుదల కోసం ప్రయత్నాలు చేస్తున్నారు బాలీవుడ్ నిర్మాతలు. అయితే అక్షయ్ కుమార్ నటించిన 'సూర్యవంశీ' మాత్రం దీపావళి రేసులో లేదంటూ తాజాగా స్పష్టం చేశారు రిలయన్స్ ఎంటర్టైన్మెంట్స్ సీఈఓ సిబాషిష్ సర్కార్.
"నేను ఒకటి స్పష్టంగా చెప్పదల్చుకున్నా. 'సూర్యవంశీ' చిత్రాన్ని దీపావళికి విడుదల చేయడం కుదరదు. అన్ని థియేటర్లు అక్టోబర్ 15న తెరుచుకోవట్లేదని సమాచారం. మేము 'సూర్యవంశీ', 83 విడుదల తేదీలపై ఇంకా ఏ స్పష్టత ఇవ్వలేం. రెండు చిత్రాల విడుదల తేదీలు వాయిదా వేస్తామా? లేక ఒక చిత్రం వాయిదా వేస్తామా? అన్నది ఇప్పుడే చెప్పలేం. కానీ డిసెంబర్ నుంచి మార్చి వరకు సినిమాలు విడుదల చేయడానికి అనువైన సమయం అనుకుంటున్నాం."