'జాను'.. హృదయాన్ని హత్తుకునే ఈ ప్రేమకథతో త్వరలోనే ప్రేక్షకుల ముందుకు రానున్నారు శర్వానంద్, సమంత. తమిళంలో విజయం అందుకున్న '96' చిత్రానికి ఇది రీమేక్‌గా రూపొందుతోంది. దీని తర్వాత మరోసారి ఈ జంట కలిసి నటించబోతుందంటూ సినీ వర్గాల్లో ప్రచారం సాగుతోంది.
'ఆర్‌ఎక్స్‌ 100" చిత్ర దర్శకుడు అజయ్‌ భూపతి గతంలో 'మహా సముద్రం' అనే క్రేజీ ప్రాజెక్టు చేస్తున్నట్లు వార్తలొచ్చాయి. ఇందులో ఇద్దరు కథానాయకులకు అవకాశం ఉందట. ఈ నేపథ్యంలోనే రవితేజ, నాగ చైతన్య, కార్తికేయ, విశ్వక్‌సేన్‌ పేర్లు వినిపించినప్పటికీ స్పష్టత లేదు. తాజాగా శర్వానంద్.. అజయ్‌ భూపతి దర్శకత్వంలో నటిస్తున్నాడని టాలీవుడ్‌ టాక్‌. ఇప్పటికే ఈ విషయంపై ఇద్దరి మధ్య చర్చలు సాగాయని, దాదాపు ఖరారయ్యే అవకాశాలున్నాయని తెలుస్తోంది. మరో కథానాయకుడి కోసం అన్వేషిస్తుందట చిత్ర బృందం.