పక్కింటోళ్లను బెదిరించి.. ప్రముఖ నటి పాయల్​ అరెస్టు

అహ్మదాబాద్​ పోలీసులు శుక్రవారం ప్రముఖ నటిని అరెస్టు చేశారు. ఆమె నివాసం ఉంటున్న హౌసింగ్​ సొసైటీ నివాసితులను దూషించిన కారణంగా వివాదాస్పద నటి పాయల్​ రోహత్గీని(Payal Rohatagi) అరెస్టు చేసినట్లు పోలీసులు వెల్లడించారు.

బాలీవుడ్​ నటి పాయల్​ రోహత్గీని(Payal Rohatagi) అహ్మదాబాద్​ పోలీసులు శుక్రవారం అరెస్టు చేశారు. తాను నివసిస్తున్న హౌసింగ్ సొసైటీలో నివాసితులను బెదిరించిందని సొసైటీ ఛైర్మన్​ డాక్టర్​ పరాగ్​ షా ఇచ్చిన ఫిర్యాదు ఆధారంగా పాయల్​ను అదుపులోకి తీసుకున్నట్లు పోలీసు అధికారి ఎ.ఎస్​.రాయ్​ వెల్లడించారు.

ఆ హౌసింగ్​ సొసైటీలో ఏడాది కాలంగా తల్లిదండ్రులతో పాటు నటి పాయల్​ రోహత్గీ నివాసం ఉంటుంది. అయితే ఆమె కొంతకాలంగా సమీపంలో నివసిస్తున్న పిల్లలను దూషిస్తుందని.. ఛైర్మన్​ పరాగ్​ షా ఆరోపించారు. ఆయన ఇచ్చిన ఫిర్యాదుతో నటిపై ఇండియన్​ పీనల్​ కోడ్​ ప్రకారం 294-బి, 504, 506 సెక్షన్ల కింద పోలీసులు ఎఫ్​ఐఆర్​ నమోదు చేసి.. నటి పాయల్​ రోహత్గీని అదుపులోకి తీసుకున్నారు.

బెయిల్​పై విడుదల

శుక్రవారం అరెస్టు అయిన బాలీవుడ్​ నటి పాయల్​ రోహత్గీకి రూరల్​ కోర్టు కొన్ని షరతులు బెయిల్​ మంజూరు చేసింది. నెలకు ఓ సారి పోలీస్​ స్టేషన్​లో రిపోర్టు చేయాల్సి ఉంటుందని కోర్టు పేర్కొంది. అదే విధంగా న్యాయస్థానం అనుమతి లేకుండా చిరునామా మార్చకూడదని న్యాయమూర్తి అదేశించారు.

ఇదీ చూడండి..Shah Rukh Khan: 'హీరోగా పునర్నిర్మాణ దశలో ఉన్నా'