సార్వత్రిక ఎన్నికల ఫలితాల్లో సినీప్రముఖులు కొంత మంది విజయ ఢంకా మోగించారు. సుమలత, సన్నీదేఓల్, హేమమాలిని గెలుపొందగా.. మరికొంతమంది పరాజయం పాలయ్యారు. లోక్సభ ఎన్నికల్లో ఓటమి చవిచూసిన ప్రముఖుల గురించి ఇప్పుడు చూద్దాం.
శతృఘ్న సిన్హా...
భాజపా నుంచి కాంగ్రెస్ పార్టీలోకి చేరిన శతృఘ్న సిన్హా పట్నాసాహిబ్ స్థానం నుంచి లోక్సభకు పోటీ చేశారు. అయితే భాజపా అభ్యర్థి, కేంద్ర మంత్రి రవిశంకర్ ప్రసాద్ చేతిలో పరాజయం చెందారు.
నిఖిల్కుమార స్వామి గౌడ..
కర్ణాటక సీఎం కుమారస్వామి కుమారుడైన నిఖిల్ కుమారస్వామి గౌడ స్వతంత్ర అభ్యర్థి సుమలత అంబరీష్ చేతిలో ఓడిపోయాడు. జేడీఎస్ పార్టీ తరపున మండ్య నుంచి లోక్సభకు పోటీ చేశాడు నిఖిల్.
ఊర్మిళా మాతోండ్కర్...
ఇటీవల కాంగ్రెస్ పార్టీలో చేరిన బాలీవుడ్ నటి ఊర్మిళా మాతోండ్కర్ ఉత్తర ముంబయి నుంచి పోటీచేశారు. భాజపా అభ్యర్థి గోపాల్ శెట్టి చేతిలో ఓడిపోయారు.
జయప్రద..
సమాజ్వాది పార్టీ నుంచి భాజపాలో చేరిన జయప్రద ఓడిపోయారు. ఉత్తరప్రదేశ్ రామ్పుర్ నుంచి పోటీ చేసిన ఈమె సమాజ్వాది పార్టీ అభ్యర్థి ఆజం ఖాన్ చేతిలో పరాజయం చెందారు.
రాజ్బబ్బర్...
ప్రముఖ నటుడు రాజ్బబ్బర్ భాజపా అభ్యర్థి రాజ్కుమార్ చాహర్ చేతిలో ఓడిపోయారు. కాంగ్రెస్ పార్టీ తరపున ఫతేపూర్సిక్రీ నుంచి పోటీ చేశారు.
ప్రియా దత్..
బాలీవుడ్ నటుడు సంజయ్ దత్ సోదరి ప్రియా సునిల్ దత్ ఓటమి పాలయ్యారు. కాంగ్రెస్ తరపున ముంబయి నార్త్ సెంట్రల్ నుంచి పోటీ చేసిన ప్రియా భాజపా అభ్యర్ధి పూనమ్ మహాజన్ చేతిలో ఓడారు.
