విజయ్​ 'బిగిల్' టీమ్​పై ముగిసిన ఐటీ సోదాలు

'బిగిల్​' చిత్ర ప్రముఖుల ఇళ్లు, కార్యాలయాలలో ఐటీ సోదాలు ముగిశాయి. పన్ను ఎగవేత ఆరోపణల నేపథ్యంలో ఈ సోదాలు చేపట్టారు అధికారులు.

'బిగిల్‌' చిత్ర ప్రముఖుల ఇళ్లు, కార్యాలయాలలో ఆదాయపు పన్ను శాఖ అధికారుల సోదాలు శనివారంతో ముగిశాయి. పన్ను ఎగవేత ఆరోపణల నేపథ్యంలో హీరో విజయ్‌తో పాటు చిత్ర నిర్మాణ సంస్థ ఏజీఎస్‌, ఫైనాన్షియర్‌ అన్బుచెళియన్‌ ఇళ్లు, కార్యాలయాలతోపాటు ప్రదర్శన హక్కులు దక్కించుకున్న స్క్రీన్‌ సీన్‌ సంస్థల్లో ఈ సోదాలు చేపట్టారు.

నైవేలిలో షూటింగ్‌ స్పాట్‌ నుంచి విజయ్‌ను చెన్నైలోని పణయూర్‌లో ఉన్న ఆయన నివాసానికి తీసుకొచ్చి మరీ విచారించారు. ఆయన నివాసాల్లో సోదాలు గురువారంతో ముగియగా... ఏజీఎస్‌ సంస్థ, అన్బుచెళియన్‌ నివాసాలు, కార్యాలయాల్లో కొనసాగాయి. ఇవి శనివారం ఉదయం ముగిశాయి. అన్బుచెళియన్‌ వద్ద లెక్కచూపని కరెన్సీ రూ.77 కోట్లను స్వాధీనం చేసుకున్నట్లు అధికారులు తెలిపారు.

ఏజీఎస్‌, అన్బుచెళియన్‌ నివాసాల్లో అధిక సంఖ్యలో దస్త్రాలు స్వాధీనం చేసుకున్నారు. వాటిని పరిశీలించిన అనంతరం తదుపరి దర్యాప్తు నిర్వహించనున్నట్లు అధికారులు పేర్కొన్నారు.

ఇరువర్గాల ఆందోళన

నైవేలిలో జరుగుతున్న 'మాస్టర్‌' షూటింగ్‌ను రద్దు చేయాలని కోరుతూ భాజపా కార్యకర్తలు ఎన్నెల్సీలోని షూటింగ్‌ స్పాట్‌ వద్ద ఆందోళన చేపట్టారు. దీనికి పోటీగా విజయ్‌ అభిమానులు కూడా నిరసన తెలిపారు. దీంతో ఆ ప్రాంతంలో ఉద్రిక్త వాతావరణం నెలకొనడం వల్ల పోలీసులు బందోబస్తు ఏర్పాటు చేశారు.

ఎన్నెల్సీ ప్రాంతంలో నిబంధనల ప్రకారం షూటింగ్‌కు గతంలోనే అనుమతులు నిరాకరించారని.. ఇప్పుడు విజయ్‌ చిత్రానికి ఇవ్వడంపై భాజపా సీనియర్‌ నాయకుడు ఇల గణేశన్‌ అభ్యంతరం వ్యక్తం చేశారు. విజయ్‌పై తమకు ఎలాంటి కక్ష లేదని.. ఏ నటుడి సినిమా అయినా ఇక్కడ చిత్రీకరిస్తే ఇలాగే అడ్డుకునే వారమని వెల్లడించారు.

ఇదీ చూడండి : రివ్యూ: మనసును మీటే అందమైన ప్రేమకావ్యం 'జాను'