హాస్యనటుడిగా, హీరో, ప్రతినాయకుడిగా తెరపై మెరిసిన సునీల్.. ఎవరూ ఊహించని అవతారం ఎత్తబోతున్నారని సినీ వర్గాల సమాచారం. ఎప్పటి నుంచో దర్శకుడు కావాలనే ఆలోచనలో ఉన్న ఆయన త్వరలోనే మోగాఫోన్ పట్టుకోనున్నట్లు తెలిసింది. విజయవంతమైన ఓ మరాఠీ చిత్రాన్ని రీమేక్ చేసేందుకు సన్నాహాలు చేస్తున్నారని ప్రచారం సాగుతోంది.
ఆ సినిమా రీమేక్ హక్కులు సొంతం చేసుకుని, ఓ ప్రముఖ నిర్మాతతో సినిమా చేసేందుకు ప్రణాళికలు రచిస్తున్నారట. వచ్చే ఏడాదిలో చిత్రీకరణ ప్రారంభకానుందని వినికిడి. ఇప్పటికే కొందరు నాయకులు దర్శకులుగా మారి ఆకట్టుకున్నారు. మరి సునీల్ ఎలా అలరిస్తారో తెలియాలంటే కొంతకాలం ఆగాల్సిందే.