మాస్క్​పై సోనూసూద్.. చీరపైనా సోనూ చిత్రమే

లాక్​డౌన్​లో వలసకూలీలకు సాయంగా నిలిచిన నటుడు సోనూసూద్​ పుట్టినరోజును ఆయన అభిమానులు ఘనంగా నిర్వహించారు. సూరత్​లో ఓ చీరపై సోనూ ఫొటో వచ్చే విధంగా తయారు చేయించారు.

లాక్​డౌన్​లో వలసకూలీలకు సాయం చేసి, వారి పాలిట దైవంగా మారాడు బాలీవుడ్​ నటుడు సోనూసూద్​. గురువారం(జులై 30) సోనూ పుట్టినరోజు సందర్భంగా సూరత్​లోని ఆయన అభిమానులు వేడుకలను ఘనంగా నిర్వహించారు.

చీరపై సోనూసూద్​ చిత్రం

గుజరాత్​లోని సూరత్​ చీరలకు ప్రసిద్ధి. సోనూసూద్​ వలసకూలీలకు చేసిన సాయాన్ని తెలుపుతూ, ఓ ఫొటోను చీరపై ముద్రించారు. 'ఏదైనా ప్రాంతంలో చిక్కుకుపోయి, ఇంటికి వెళ్లానుకునే వారు సోనూభాయ్​కు చెప్పాలి' అనే నినాదాన్ని దానిపై రాశారు. లాక్​డౌన్​ అమల్లో ఉండటం వల్ల సోనూ ఫొటోను ప్రింట్ చేసిన మాస్క్​లు ధరించి వేడుకను చేసుకున్నారు. దీనిని వీడియోకాల్​ ద్వారా వీక్షించిన సోనూ.. వారందరికీ కృతజ్ఞతలు చెప్పారు.

కష్టానికి సాయం అనే మందు

లాక్​డౌన్​లో వలసకూలీలను స్వస్థలాలకు చేర్చడం దగ్గర నుంచి నిరుపేద రైతులు, నిరుద్యోగులకు సాయం చేయడం సహా ఎన్నో మంచిపనులు చేస్తున్నారు. సినిమాల్లో అతడి నటనకు అభిమానులు కాకపోయినా.. నిజజీవితంలో మాత్రం సోనూ గుండెల్లో పెట్టుకుంటున్నారు.