'నువ్వేమైనా చిరంజీవి అనుకుంటున్నావా?'

మెగాహీరో చిరంజీవిని ఇటీవలే కలిసిన నటుడు సత్యదేవ్.. ఆ ఆనందాన్ని సోషల్ మీడియా వేదికగా పంచుకున్నారు. ఇతడు నటించిన 'ఉమామహేశ్వర ఉగ్రరూపశ్య' సినిమా విడుదల కావాల్సి ఉంది.

ఓ వ్యక్తిని ఆదర్శంగా తీసుకుని... సినిమా పరిశ్రమలో ఆయనలా ఎదగాలని లక్ష్యంగా పెట్టుకుని కష్టపడుతున్నాడు ఓ కుర్రాడు. దాని కోసం నిరంతరం శ్రమిస్తూనే ఉన్నాడు. అయితే ఓరోజు తన ఆదర్శాన్ని నేరుగా కలిసే అదృష్టం వచ్చింది. అలా వెళ్లి కలిసి వచ్చిన ఆ కుర్రాడి మనసులో భావాలకు అక్షర రూపమిచ్చాడు. ఆ కుర్రాడే యువ నటుడు సత్యదేవ్‌.. కలిసింది ప్రముఖ నటుడు మెగాస్టార్ చిరంజీవిని. మరి సత్యదేవ్‌ ఏం రాశారో మీరే చదవండి.

"నా చిన్నప్పుడు మా క్లాస్ రూం గోడ మీద ఒక పెద్ద స్కేల్ బొమ్మ ఉండేది. ఆరడుగుల దాకా గీసి, ఆపేసారు. రెండు, మూడు నెలలకొకసారి ఎంత పొడవు పెరిగామో కొలవటానికి ఒక్కొక్కరినీ గోడకు అనుకుని నిలబడమనేవారు. ఒక రోజు మా టీచర్‌ని "మాలో ఎవరైనా ఆ సీలింగ్ కన్నా పొడవు పెరిగితే ఎలా టీచర్?" అని అడిగాను. అప్పుడు మా టీచర్ అడిగిన ప్రశ్న... "నువ్వేమైనా చిరంజీవి అనుకుంటున్నావా?"

ఆ తరువాత చాలాసార్లు, చాలాచోట్ల అవే మాటలు విన్నాను. 'కష్టతరం', 'అసాధ్యం' అనిపించే పనులు చేయటానికి ఎవరు పూనుకున్నా చుట్టూ ఉన్న వాళ్లలో ఎవరో ఒకరు అనే మాటలు ఇవి.

నేను సినిమాల్లోకి వద్దామనుకున్నప్పుడు నాకు మళ్లీ అదే ప్రశ్న ఎదురుపడింది. "నేను చిరంజీవిని" అనుకోలేదు. కొన్ని కోట్ల మందిలా చిరంజీవి అవ్వాలనుకున్నాను. నేను ఏం సాధించాను, ఎంత సాధించాలి అని కొలవటానికి నా 'లైఫ్' గోడ మీద నేను గీసుకున్న స్కేల్... చిరంజీవి.

ఎవరెస్ట్ ఎక్కటానికి బయలుదేరిన ప్రతి ఒక్కడికీ అనుమానాలు, భయాలూ తప్పవు. దారిలో ఊహించని అడ్డంకులు. కుంగదీసే గాయాలు. "ఇక నా వల్ల కాదు" అని వెనక్కు తిరిగి పోవాలనుకున్నప్పుడు.. ఆ శిఖరం మీద ఉన్న జెండా కనిపిస్తుంది. ఏదో తెలియని ధైర్యం వస్తుంది. శక్తి పుంజుకుని మళ్లీ ప్రయాణం కొనసాగిస్తాం. తెలుగు సినిమాల్లోకి నటుడవ్వాలని వచ్చిన నా లాంటి వేల మందికి చిరంజీవి అనే వ్యక్తి ఆ జెండా.

మొన్న జులై 8న చిరంజీవి గారిని వాళ్ల ఇంట్లో కలిసాను. ఆ ఆనందం నుంచి ఇంకా పూర్తిగా తేరుకోలేదు. కలలానే ఉంది. సర్... మీరు నాకు చెప్పిన ప్రతి మాటా గుర్తుంది. భద్రంగా నా మనసులో దాచుకుంటాను.

"చిరంజీవి గారిని కలవటానికి వెళ్తున్నాను" అని చెప్పినప్పుడు.. మా ఇంట్లో వాళ్ల నుంచి అదే ప్రశ్న... "నువ్వేమైనా చిరంజీవి అనుకుంటున్నావా?"

ఈ పోస్టు చూసి ప్రముఖ దర్శకుడు పూరీ జగన్నాథ్‌ స్పందించారు. 'అన్నయ్య నిన్ను ఎంతగా ఇన్‌స్పైర్‌ చేసివుంటారో నేను ఊహించగలను. రాసిపెట్టుకో.. ఆయనతో జరిగిన సమావేశం నీ జీవితాన్ని మార్చేస్తుంది' అని ట్వీట్‌ చేశారు. దానికి సమాధానంగా 'అవును సర్‌... తర్వాతి 20 ఏళ్లకు సరిపడేంతగా నాలో ఆత్మవిశ్వాసం పెరిగింది' అని సత్యదేవ్‌ ట్వీట్‌ చేశారు.