సాధారణంగా సినీ నటులకు అభిమానుల బెడద ఎక్కువ. ఎక్కడికి వెళ్లినా సెల్ఫీలు అంటూ చుట్టుముట్టి ఇబ్బంది పెడుతుంటారు. అందుకనే వారు విమానాల్లో అయితే బిజినెస్ క్లాస్లోనే వెళతారు. కానీ బాలీవుడ్ సూపర్స్టార్ ఆమిర్ ఖాన్ మాత్రం సాధారణ ప్రయాణికుడిలా ఎకానమీ క్లాస్లో వెళ్లారు. సదరు వీడియో సామాజిక మాధ్యమాల్లో చక్కర్లు కొడుతోంది.
ఈ విషయంపై నెటిజన్లు విభిన్నంగా స్పందిస్తున్నారు. ఆమిర్ నటించిన గత చిత్రం 'థగ్స్ ఆఫ్ హిందుస్థాన్' భాక్సాఫీస్ దగ్గర బోల్తా కొట్టింది. అందుకే ఎకానమీ క్లాస్లో ప్రయాణిస్తున్నాడని కొందరు జోకులు పేల్చుతున్నారు.
అసలు కారణం ఇది..!
ఇటీవల ప్రఖ్యాత విమానయాన సంస్థ జెట్ ఎయిర్వేస్.. విమాన ప్రయాణాల్ని ఆపేసింది. చాలా మంది టికెట్లు రద్దు చేసింది. చేసేదేమి లేక ఇతర సంస్థలకు చెందిన విమానాల్లో టికెట్లు బుక్ చేసుకున్నారు. అలా ఇండిగో విమానంలో ఎకానమీ క్లాస్లో ప్రయాణించాడు ఆమిర్ ఖాన్. ఆ సమయంలో ఒక అభిమాని అతడ్ని వీడియో తీశాడు. అదే ఇప్పుడు వైరల్ అవుతోంది.
ఆమిర్ ప్రస్తుతం 'లాల్ సింగ్ చద్దా'లో నటించేందుకు సిద్ధమవుతున్నాడు. 'సీక్రెట్ సూపర్స్టార్' చిత్రాన్ని తెరకెక్కించిన అద్వైత్ చతుర్వేది ఈ సినిమాకు దర్శకత్వం వహించనున్నాడు. హాలీవుడ్ సినిమా 'ఫారెస్ట్ గంప్'కు ఇది రీమేక్.
