మీ వాట్సాప్‌లోని గ్రూపులు, వ్యక్తిగత ఖాతాల్లో మెసేజ్లు వారం రోజులకు ఒకసారి మాయం అయిపోవాలంటే ఏం చేయాలో మీకు తెలుసుగా.. సింపుల్‌ ఆ ఖాతా ఇన్ఫో పేజీలో డిస్అపియరింగ్ మెసేజెస్‌ ఫీచర్‌ను యాక్టివ్‌ చేసుకోవడమే. అయితే ఈ ఫీచర్‌లో వారం రోజులు కాకుండా ఒక్క రోజే ఉంటే బాగుండు అని అనుకున్నారా..? అయితే మీ ఆలోచన నిజం కాబోతోంది.. అవును 24 గంటల్లో మొత్తం అన్ని రకాల పోస్టులు డిలీట్ అయ్యే ఆప్షన్ త్వరలో రాబోతోందట.
కొత్త ఆప్షన్‌ను ఇలా తీసుకొస్తూనే, బ్యాగ్రౌండ్‌లో దానికి అదనపు మెరుగులు దిద్దడం వాట్సాప్‌కు అలవాటు. అలా డిస్అపియరింగ్ మెసేజెస్‌కు ఇప్పుడు టైమ్‌ సెలక్షన్‌ ఆప్షన్‌ను తీసుకొస్తున్నారట. అంటే డిస్అపియరింగ్ ఆప్షన్‌ను ఆన్‌ చేసిన వెంటనే ఎన్ని రోజులకు డిలీట్ అవ్వాలి అని అడుగుతుందట. అందులో 24 గంటలు, ఏడు రోజులు అని రెండు ఆప్షన్లు ఉంటాయి. వాటిలో మీకు కావాల్సింది ఎంచుకుంటే సరి. అక్కడ 24 గంటలు ఎంచుకుంటే, ఒక రోజులో మెసేజ్లు మాయమవుతాయి. ప్రస్తుతం ఈ ఫీచర్ ప్రయోగ దశలో ఉంది. కొంతమందికి ప్రయోగాత్మకంగా అందుబాటులోకి తీసుకొచ్చారు. త్వరలో అందరికీ యాక్సెస్‌లోకి వస్తుంది.