Whatsapp Privacy Breach : స్మార్ట్ఫోన్ ఉపయోగించని సమయంలోనూ వాట్సాప్.. మైక్రోఫోన్ను ఉపయోగిస్తోందన్న ఆరోపణలు కొద్ది రోజుల క్రితం నెట్టింట కలకలం రేపాయి. ఇవి వ్యక్తిగత గోప్యతకు భంగం కలుగుతోందన్న ఆందోళనలకు సైతం దారితీశాయి. ట్విట్టర్లో ఇంజినీరింగ్ డైరెక్టర్గా పని చేసే ఫోవద్ దబిరి దీనిపై ఓ ట్వీట్ కూడా చేశారు. మన మాటల్ని వాట్సాప్ రహస్యంగా రికార్డు చేస్తోందని ఆయన ఆరోపించారు. తాను నిద్రపోతున్న సమయంలోనూ.. తన స్మార్ట్ఫోన్లోని మైక్రోఫోన్ను వాట్సాప్ ఉపయోగించిందని చెప్పారు. ఆ తర్వాత తాను నిద్రలేచి స్మార్ట్ఫోన్ వాడడం మొదలుపెట్టాక.. మైక్రోఫోన్ పని చేస్తూనే ఉందని తెలిపారు.
ఇలా ఒక రోజు ఉదయం 4.20 నుంచి 6.53 మధ్య మైక్రోఫోన్ను వాట్సాప్ 9 సార్లు ఆన్ చేసిందని వివరించారు. ఇందుకు సంబంధించిన ఆధారాల్ని ట్విట్టర్లో షేర్ చేశారు ఫోవద్ దబిరి. అసలు ఏం జరుగుతోందని వాట్సాప్ను ప్రశ్నించారు. ఇలాంటి సమయాల్లో వాట్సాప్ వినియోగదారులు ఎలాంటి జాగ్రత్తలు తీసుకోవాలో ఇప్పుడు తెలుసుకుందాం.
ఈ తరహా సమస్యలను నిర్మూలించేందుకు గూగుల్ ఆండ్రాయిడ్ 12 వెర్షన్లో ఓ ప్రైవసీ డ్యాష్బోర్డును తీసుకువచ్చింది. దీంతో యాప్‌లకు అందించిన అన్ని అనుమతులను.. టైం ఇంకా డేట్తో పాటు వినియోగ కాలక్రమాన్ని సైతం యూజర్ ట్రాక్ చేసేందుకు ఈ ఆపరేటింగ్ సిస్టమ్ వినియోగదారులకు అనుమతిస్తుంది.
వాట్సాప్ వినియోగదారుల స్మార్ట్ఫోన్లో బ్యాక్గ్రౌండ్ మైక్రోఫోన్ వినియోగిస్తుందా లేదా అన్న విషయాన్ని తనిఖీ చేసే ముందు ఒకసారి మీ స్మార్ట్ఫోన్ను చెక్ చేసుకోవాలి. మీ మొబైల్ కుడి పైభాగాన యాదృచ్ఛికంగా ఆకుపచ్చ సూచికను గమనించినట్లయితే.. ఓ సారి చెక్ చేసుకోవడం మరి మంచిది. మీ మొబైల్లో కెమెరా లేదంటే మైక్రోఫోన్‌ని ఉపయోగించే కొన్ని యాప్లు ఉన్నాయని ఇది సూచిస్తుంది. మీ విషయంలో ఇది జరిగినట్లయితే అదనపు శ్రద్ధ వహించాలి.
How to Check Whatsapp Microphone Usage : వాట్సాప్ మన బ్యాక్గ్రౌండ్లో మైక్రోఫోన్ వినియోగిస్తుందో లేదో ఇలా చెక్ చేసుకోవాలి.
- మొదట మీ ఆండ్రాయిడ్ స్మార్ట్ఫోన్లో సెట్టింగ్స్లోకి వెళ్లండి. అనంతరం ప్రైవసీ అండ్ సెక్యూరిటీ ఆప్షన్పై నొక్కండి.
- తరువాత కిందికి స్క్రోల్ చేసి ప్రైవసీ ఆప్షన్పై క్లిక్ చేయండి
- అనంతరం మైక్రోఫోన్ను ఉపయోగించిన అన్ని యాప్‌ల పూర్తి కాలక్రమాన్ని తనిఖీ చేసేందుకు మైక్రోఫోన్ సింబల్పై నొక్కండి.
- వెంటనే వివిధ యాప్లు ఉపయోగించిన మైక్రోఫోన్ స్టేటస్లు మనకు కన్పిస్తాయి. అందులో వాట్సాప్ మైక్రోఫోన్ను వినియోగిస్తోందని చూపిస్తే.. మీ మాటలను వాట్సాప్ రికార్డ్ చేస్తుందని భావించాలి. ఒకవేళ అలా కాకపోతే భయపడాల్సిన అవసరం లేదు.
బ్యాక్గ్రౌండ్ మైక్రోఫోన్ను వాట్సాప్ వినియోగిస్తుంటే ఏం చేయాలి?
ఈ సందర్భంలో మొదటగా వాట్సాప్ నుంచి మైక్రోఫోన్ యాక్సెస్‌ను నిలిపివేయాలి. ఇందుకోసం యాప్‌ల సెక్షన్ నుంచి వాట్సాప్నకు వెళ్లాలి. అనంతరం మైక్రోఫోన్ యాక్సెస్‌ను నిలిపివేయాలి.
వినియోగదారుల స్మార్ట్ఫోన్లో బ్యాక్గ్రౌండ్ మైక్రోఫోన్ వాట్సాప్ వినియోగిస్తుందా లేదా అనేది తనిఖీ చేయాలనుకుంటే.. మీ ఆండ్రాయిడ్ స్మార్ట్ఫోన్ రన్నింగ్ వెర్షన్ 12 లేదా అంతకంటే ఎక్కువ ఉండాలి. దాంతోపాటు మైక్రోఫోన్ యాక్సెస్‌తో యాక్టివ్ వాట్సాప్ ఖాతా కలిగి ఉండాలి
