Genome Sequencing meaning: కరోనా వైరస్ ప్రపంచ దేశాలను ఇంకా వెంటాడుతూనే ఉంది. కొత్త రూపాలతో మానవాళిని భయపెడుతోంది. తాజాగా ఒమిక్రాన్ రూపంలో ఉరుముతున్న ఈ మహమ్మారి కేసులు మన దేశంలోనూ గణనీయంగా పెరుగుతున్నాయి. రెండు డోసుల టీకా వేసుకున్నా వదలడంలేదు. జన్యు మార్పులకు గురవుతూ వ్యాప్తి చెందుతూనే ఉంది. ఈ నేపథ్యంలో విదేశాల నుంచి వచ్చేవారితో పాటు మిగతా వారికి కూడా కొవిడ్‌ -19 పాజిటివ్‌గా తేలితే వారి శాంపిల్స్‌ని జీనోమ్ సీక్వెన్సింగ్ ల్యాబ్‌కు పంపిస్తున్నారు. ఈ క్రమంలో అసలు ఒక వైరస్‌లో వివిధ వేరియంట్లను పరిశోధకులు ఎలా గుర్తిస్తారో అనే సందేహం చాలా మందిలో తలెత్తుతుంటుంది. ఒమిక్రాన్‌ని గుర్తించడంతో పాటు దాని వ్యాప్తిని కట్టడి చేసి కొత్త ఉత్పరివర్తనాలను గుర్తించడంలో జీనోమ్ సీక్వెన్సింగ్ ప్రక్రియదే కీలక పాత్ర. గతంలో కొవిడ్‌ స్ట్రెయిన్లతో పాటు సెకండ్‌ వేవ్‌కు కారణమైన డెల్టా రకాన్ని కూడా ఇదే పద్ధతిలో గుర్తించారు. అసలు జీనోమ్ సీక్వెన్సింగ్ ఎలా చేస్తారు? వేరియెంట్లను గుర్తించడంలో ఈ పద్ధతి ఎలా సహాయపడుతుందో గమనిస్తే..
Genome Sequencing uses
ఆర్ఎన్ఏ అణువు నుంచి జన్యుపరమైన సమాచారాన్ని సేకరించేందుకు ఉపయోగపడే సాంకేతిక ప్రక్రియే జీనోమ్ సీక్వెన్సింగ్. వైరస్ రకం, ఉత్పరివర్తనాలు (మ్యుటేషన్లు), ఏ పద్ధతిలో మనుషులపై దాడి చేస్తుంది? ఎలా వ్యాప్తి చెందుతుంది? తదితర కీలక సమాచారాన్ని తెలుపుతుంది. ఈ సాంకేతికత అర్థం కావాలంటే శరీరంలో వైరస్ సంక్రమణ ఎలా జరుగుతుందో తొలుత తెలియాలి. డీఎన్‌ఏ అణువులతో మనిషి శరీరం నిర్మితమైనట్టే వైరస్ కూడా డీఎన్‌ఏ లేదా ఆర్ఎన్ఏ రూపంలో ఏర్పడుతుంది. కరోనా ఆర్‌ఎన్‌ఏతో ఏర్పడినదే ఈ వైరస్.