ఈ బుర్ర లేని రోబో భలే హెల్ప్ చేస్తుంది గురూ!

మనుషుల అవసరాలు సులభంగా తీర్చుకునేందుకు సాంకేతికత ప్రస్తుతం ఎంతగానో ఉపయోగపడుతోంది. ముఖ్యంగా భౌతికంగా మనుషులకు శ్రమ తగ్గించేందుకు కొత్త రకం రోబోలు అందుబాటులోకి వస్తున్నాయి. అందులో భాగంగా పెద్ద పెద్ద బాక్సులను మోయడానికి వీలుగా ప్రత్యేక రోబోను రూపొందించింది ఓ కంపెనీ. తల లేకుండా.. వింతగా ఉన్న ఆ రోబో విశేషాలు మీ కోసం.

రోబోలపై మన అవగాహన రోజు రోజుకు పెరుగుతోంది. ఈ నేపథ్యంలో కంపెనీలు కూడా మనుషులకు సహాయం చేసే వినూత్న రోబోల కోసం నిరంతరం కృషి చేస్తున్నాయి. మానవులకు సాయం చేసేందుకు.. బోస్టన్ రోబోటిక్స్​ రూపొందించిన రోబో డాగ్​ వంటి వాటిని మనం ఇప్పటికే చూశాము. ఇప్పుడు బరువైన వస్తువులను మోయడంలో మనుషులకు సాయం చేసే కొత్త రకం రోబోను తయారు చేసింది మరో సంస్థ.

డిజిట్ అని పిలువబడే ఈ హ్యూమనాయిడ్ రోబో.. ఫ్యాక్టరీల్లో, కార్యాలయాల్లో పెద్ద పెద్ద బాక్సులు, వస్తువులను ఒక చోటు నుంచి ఇంకో చోటుకు మార్చగలుగుతుంది. ఇతర రోబోలతో పోలిస్తే ఈ రోబో డిజైన్​ కూడా ప్రత్యేకంగా ఉంటుంది. ఇంకా చెప్పాలంటే.. ఈ రోబోకు అసలు తల ఉండదు.

మనుషులకు సాయం చేసే తల లేని రోబో

రోబో కిందివైపు భాగాలను పరిశీలిస్తే.. మోకాళ్ల వద్ద అసాధారణ వంపు ఉంటుంది. ఈ ప్రత్యేకమైన డిజైన్​ వల్ల ఆ రోబో బరువైన వస్తువులను చేతులపై పెట్టుకుని ముందుకు నడిచేందుకు ఉపయోగపడుతుంది. దీనివల్లే బరువైన వస్తువులను పట్టుకుని మెట్లపైకి కూడా ఎక్కగలదు ఈ రోబో. కిందకు వంగి బాక్సులను స్వయంగా ఎత్తుకోవడం ఈ రోబో మరో ప్రత్యేకత. ఈ రోబోను ఎజిలిటీ రోబోటిక్స్ అనే సంస్థ రూపొందించింది.

ఇదీ చూడండి:టెక్ సంస్థలపై ఇంత వ్యతిరేకత ఎందుకు?