Admin Review Feature In WhatsApp : వినియోగదారుల భద్రత, గోప్యతే లక్ష్యంగా ప్రముఖ మెసేజింగ్ ప్లాట్ఫామ్ వాట్సాప్.. కొత్త అప్డేట్లు, ఫీచర్లు తెస్తూ యూజర్స్కు మరింత దగ్గరవుతోంది. ఇప్పటికే ఎన్నో అప్డేట్లను అందుబాటులోకి తెచ్చిన వాట్సాప్ తాజాగా మరో సరికొత్త ఫీచర్ను ప్రవేశపెట్టనుంది. అదే 'అడ్మిన్ రివ్యూ ఫీచర్'. కాగా, ఈ ఫీచర్ గ్రూపు చాట్లల్లో మాత్రమే పనిచేయనుంది. ముఖ్యంగా గ్రూప్ అడ్మిన్ల కోసం దీనిని రూపొందించారు. అయితే ప్రస్తుతానికి బీటా టెస్టర్లకు మాత్రమే అందుబాటులో ఉన్న ఈ ఫీచర్ను.. మున్ముందు అందరికీ అందుబాటులోకి తీసుకొచ్చేందుకు వాట్సాప్ పనిచేస్తున్నట్లు వాట్సాప్ అప్డేట్లను సమీక్షించే వెబ్సైట్ Wabetainfo వెల్లడించింది. ఈ కొత్త ఫీచర్ సాయంతో గ్రూప్ అడ్మిన్లు ఒక్కోసారి తాము గ్రూపుల్లో అందుబాటులో లేకున్నా సరే, తాము నిర్వహించే గ్రూపుల్లో ఇతర సభ్యులు చేసే పోస్టులు, జరిగే సంభాషణలు, చర్చలపై పూర్తి నియంత్రణను కలిగి ఉండొచ్చని తెలిపింది.
ఎలా పనిచేస్తుంది..?
WhatsApp New Features Today : వాబీటాఇన్ఫో రిపోర్ట్ ప్రకారం.. ఈ నయా ఫీచర్ను ఆస్వాదించేందుకు గ్రూప్ అడ్మిన్లు ముందుగా గ్రూప్ సెట్టింగ్స్ స్క్రీన్లోకి వెళ్లి పలు సెట్టింగ్స్ చేసుకోవాల్సి ఉంటుంది. ఈ ఆప్షన్ను అడ్మిన్లు ఎనేబుల్ చేసుకున్న తర్వాత గ్రూప్ సభ్యులు గ్రూప్లో వచ్చిన అసభ్యకర మెసేజ్లను ఈ ఫీచర్ సాయంతో గ్రూప్ అడ్మిన్కు చాట్ రూపంలో రిపోర్ట్ చేయవచ్చు. అలా రిపోర్ట్ చేసిన మెసేజ్ను డిలీట్ చేసే అధికారం గ్రూప్ అడ్మిన్కు ఉంటుంది. ఆ సందేశం అందరి చాట్లోనూ డిలీట్ అవుతుంది. అంతేకాకుండా గ్రూప్లో మరోసారి అలాంటి సందేశాలు పంపకుండా సంబంధిత సభ్యుడిని గ్రూప్ అడ్మిన్ మందలించవచ్చు.. లేదా అతడిని గ్రూప్ నుంచి తొలగించవచ్చు.