భారత్​లోనే ఐఫోన్​ 12 తయారీ- ధర తగ్గుతుందా?

టెక్​ దిగ్గజం యాపిల్.. భారత్​లో ఐఫోన్​ 12 మోడళ్ల తయారీకి కసరత్తు చేస్తున్నట్లు తెలుస్తోంది. వీటి తయారీ సామర్థ్యంలో 7%-10% వరకు చైనా నుంచి భారత్​కు తరలించాలని భావిస్తున్నట్లు సమాచారం.

లగ్జరీ స్మార్ట్​ఫోన్ల తయారీ సంస్థ యాపిల్.. ఐఫోన్​ 12 మోడళ్లను భారత్​లో తయారు చేయాలని భావిస్తున్నట్లు తెలుస్తోంది. చైనా నుంచి ఈ మోడళ్ల తయారీని భారత్​కు తరలించేందుకు కసరత్తు జరుగుతున్నట్లు ఓ ప్రముఖ వార్తా సంస్థ కథనంలో పేర్కొంది. చైనా, అమెరికా మధ్య వాణిజ్య యుద్ధం వస్తే సమస్యలు తలెత్తకుండా ఉండేందుకు యాపిల్ ఈ నిర్ణయం తీసుకుందనేది ఆ కథనం సారాంశం.

భారత్​లో తయారు కానున్న కొత్త మోడళ్లు

భారత్​లో ఇప్పటికే ఐఫోన్ ఎక్స్​ఆర్​, ఐఫోన్ 11, ఐఫోన్​ ఎస్​ఈ వంటి మోడళ్లు తయారవుతున్నాయి. ఇప్పుడు ఐఫోన్ 12 ఉత్పత్తిని భారత్​కు తరలించేందుకు కసరత్తు చేస్తోంది యాపిల్. ఐఫోన్​ 12 మినీ మోడల్​ను కూడా భారత్​లో తయారు చేయాలని భావిస్తున్నట్లు వార్తలొస్తున్నాయి. అయితే ఈ విషయంపై ఇంకా తుది నిర్ణయం వెలువడలేదు.

ఇప్పటి వరకు ఉన్న సమాచారం ప్రకారం.. 7 శాతం నుంచి 10 శాతం వరకు ఐఫోన్ 12 మోడళ్ల ఉత్పత్తి సామర్థ్యాన్ని చైనా నుంచి భారత్​కు తరలించనున్నట్లు తెలుస్తోంది.

ఐఫోన్​ 12ల తయారీ కూడా ఉత్పత్తి ఆధారిత ప్రోత్సహక (పీఎల్​ఐ) పథకం ద్వారా జరిగే అవకాశాలు ఉన్నాయి. ఇక్కడ ఉత్పత్తయ్యే మోడళ్లను భారత్​లోనే కాకుండా విదేశాలకు ఎగుమతి చేసే వీలుంది.

దేశీయంగా ఈ మోడళ్లను ఉత్పత్తి చేయడం ద్వారా యాపిల్.. దిగుమతి సుంకాల భారం తగ్గించుకోవచ్చని కూడా భావిస్తోంది. అయితే దేశీయంగా ఐఫోన్ 12ల తయారీతో భారత్​లో వాటి ధరలు ఏమైనా తగ్గే అవకాశముందా అనే విషయంపై ఇంకా స్పష్టత రావాల్సి ఉంది.

ఇదీ చదవండి:కెయిర్న్​కు భారత ఆస్తులు సీజ్ చేసే అవకాశం!