'హబుల్ టెలిస్కోప్'​పై నాసా కీలక ప్రకటన

నెల రోజుల క్రితం నిలిచిపోయిన హబుల్ టెలిస్కోప్ కార్యకలాపాల పునరుద్ధరణ దిశగా కీలక ముందడుగు పడింది. బ్యాకప్ కమాండ్ యూనిట్​ను అందుబాటులోకి తెచ్చినట్లు నాసా తెలిపింది. అంతా సవ్యంగా ఉంటే టెలిస్కోప్ కార్యకలాపాలు త్వరలోనే ప్రారంభమవుతాయని వెల్లడించింది.

హబుల్ అంతరిక్ష టెలిస్కోప్​లో సాంకేతిక సమస్య నెల రోజుల తర్వాత పరిష్కారమైంది. 2009లో వ్యోమగాములు అమర్చిన మరో కమాండ్ యూనిట్​ను అందుబాటులోకి తెచ్చేందుకు ప్రయత్నించినట్లు నాసా తెలిపింది. విజయవంతంగా బ్యాకప్ పరికరాలను ఇంజినీర్లు వినియోగంలోకి తీసుకొచ్చారని నాసా శుక్రవారం తెలిపింది. అంతా సవ్యంగా జరిగితే హబుల్ టెలిస్కోప్ కార్యకలాపాలు వెంటనే పునఃప్రారంభం అవుతాయని పేర్కొంది.

జూన్ మధ్యలో ఈ అబ్జర్వేటరీ కార్యకలాపాలు నిలిచిపోయాయి. 1980ల కాలం నాటి కంప్యూటర్​లో సమస్య వల్ల టెలిస్కోప్ నిలిచిపోయిందని నాసా తొలుత భావించింది. అయితే, బ్యాకప్ పేలోడ్ కంప్యూటర్ సైతం విఫలమైందని తర్వాత గుర్తించింది.

ఐదు రిపేర్లు

1990లో నాసా ఈ హబుల్ టెలిస్కోప్​ను ప్రయోగించింది. దీనికి ఇప్పటివరకు ఐదు సార్లు రిపేర్లు జరిగాయి. చివరిసారి 2009లో పలు మరమ్మతులను చేసింది నాసా. విశ్వం గురించి అధ్యయనం చేసేందుకు ఈ టెలిస్కోప్ పరిశోధకులకు విశేషంగా దోహదం చేసింది. 1.5 మిలియన్ పరిశీలనల్లో ఇది భాగమైంది. హబుల్​కు కొనసాగింపుగా ఈ ఏడాది చివర్లో 'జేమ్స్ వెబ్ స్పేస్ టెలిస్కోప్​'ను ప్రయోగించాలని నాసా ప్రణాళికలు రూపొందించింది.

ఇదీ చదవండి:చైనా దూకుడుకు కళ్లెం వేసే 'ఈగల్‌'