గూగుల్ తన ప్రైవసీ నిబంధనలను మరింత కఠినతరం చేస్తోంది. ఆండ్రాయిడ్ వినియోగదారుల సమాచారాన్ని అడ్వర్టైజింగ్ కంపెనీలు పసిగట్టకుండా కొత్త అప్డేట్ను తీసుకొస్తోంది. యాడ్ కంపెనీలు తమ ఫోన్లను ట్రాక్ చేయకుండా ఉంచే ఆప్షన్ను ఆండ్రాయిడ్ మొబైల్ వినియోగదారుల కోసం అందుబాటులోకి తీసుకురానుంది.
ఈ ఏడాది చివర్లో ఈ ఫీచర్ను సంస్థ ప్రవేశపెట్టనుంది. గూగుల్ ప్లే(Google Play) సర్వీస్ అప్డేట్ ద్వారా ఇది అందుబాటులోకి రానుంది. ఈ విషయాన్ని గూగుల్ మాతృసంస్థ ఆల్ఫాబెట్ వెల్లడించింది. ఈ ఆప్షన్ను వినియోగదారులు ఎంచుకుంటే.. డెవలపర్లు యూజర్ల అడ్వర్టైజింగ్ ఐడీని చూసే అవకాశం ఉండదు. దీని ద్వారా వ్యక్తిగత ప్రాధాన్యమైన(personalized ads) యాడ్లు రావడం తగ్గుతుంది.