‘ఏదో ఒక కొత్త ఐడియా కావాలి. అలాంటి ఐడియా లేకపోతే పాతదాన్నే కొత్తగా చేసి చూపాలి!’ - నేటి స్టార్టప్ల నినాదం ఇది. బైకుల్ని అద్దెకిచ్చే సంస్థలు ఈ రెండో అంశాన్ని చక్కగా ఒంటపట్టించుకున్నాయి. మనదేశంలో బైకుల్ని రోజుల తరబడి అద్దెకివ్వడం మరీ కొత్తపద్ధతేమీ కాదు. ప్రసిద్ధ పర్యటక ప్రాంతాల్లో ఈ పద్ధతి ఉండేది. కాకపోతే, ఈ వ్యాపారం పూర్తి అసంఘటితంగా, అనధికారికంగా జరిగేది. ఒక్క గోవాలో తప్ప మిగతా అన్నిచోట్లా మెకానిక్ షెడ్డులవాళ్లు వీటిని అద్దెకిస్తుండేవారు. ఆ బండిని మనం నడుపుతుంటే... వాటి డాక్యుమెంట్లవీ సరిగ్గా లేక పోలీసులు ఇబ్బంది పెడుతుండేవారు! బెంగళూరుకి చెందిన అభిషేక్ చంద్రశేఖర్, ఆకాశ్లు ఓసారి పుదుచ్చేరి వెళ్లినప్పుడు ఇలాంటి చేదు అనుభవాన్ని ఎదుర్కొన్నారు. అప్పుడే బైకుల్ని అద్దెకివ్వడాన్ని అధికారికంగా, పారదర్శకంగా చేయాలనుకున్నారు. ఆ ఆలోచన అంకురించే నాటికి ఇద్దరూ ఇంజినీరింగ్ విద్యార్థులు. మరో రెండేళ్ల తర్వాత చదువు పూర్తికాగానే ఈ ఆలోచన ఆధారంగా 2016లో ఒక స్టార్టప్ను ప్రారంభించారు. మామూలు బైకుల్ని అద్దెకిస్తే పెద్ద ఆకర్షణగా ఉండదని తొలిసారి ‘రాయల్ ఎన్ఫీల్డ్’ బైకుల్ని పరిచయం చేశారు. అందుకు తగ్గట్టే తమ సంస్థకి ‘రాయల్ బ్రదర్స్’ అని పేరుపెట్టారు. ఈ సంస్థ దేశవ్యాప్తంగా 40 నగరాల్లో విస్తరించింది. తెలుగు రాష్ట్రాల్లో హైదరాబాద్, విజయవాడ, విశాఖ, గుంటూరు నగరాల్లో బైకుల్ని అద్దెకిస్తోంది. మొత్తం రెండున్నరవేల పైచిలుకు వాహనాలని ఈ సంస్థ ఇలా అరువిస్తోంది.
రాయల్ బ్రదర్స్కి పోటీగా మరో వెయ్యి వాహనాలు అదనంగా నడుపుతోంది ‘ఓఎన్ఎన్ బైక్స్’ సంస్థ. దీని వ్యవస్థాపకులదీ దాదాపు రాయల్ బ్రదర్స్లాంటి కథే. ఓసారి గోవా వెళ్లిన వీళ్లు అక్కడ బైకుల్ని ఎంతో పారదర్శక పద్ధతిలో పకడ్బందీగా అద్దెకివ్వడం చూశారు. అలాంటి సేవల్ని అన్ని నగరాలకీ విస్తరించాలన్న ఆలోచనకి టెక్నాలజీని జోడించి ‘ఓఎన్ఎన్ బైక్స్’ని ప్రారంభించారు. ఈ సంస్థ మామూలు వినియోగదారులతోపాటూ బైకుల అవసరం ఎక్కువగా ఉన్న స్విగ్గీ, జొమాటాలాంటి సంస్థలకీ గంపగుత్తగా అద్దెకిచ్చి లాభాల బాట పట్టింది. రాయల్పాండా, డ్రైవ్ కెఫే వంటి సంస్థలూ విలాసవంతమైన బైకుల్ని అద్దెకిస్తూ తమదైన ముద్రవేస్తున్నాయి. వీటిమధ్య పోటీ పెరిగేకొద్దీ వినియోగదారులకి మరింత మంచి సేవలు అందివస్తున్నాయి.