కేరళ వంటకాలకు ఉండే ప్రత్యేకతే వేరు. అందులోనూ వారు చేసే చికెన్ కర్రీ (kerala chicken) చూస్తుంటూనే నోరూరిపోతుంది. దాంతో పాటు వెన్నపూసిన రొట్టె తిన్నారంటే.. ఆహా అంచూ మైమరిచిపోవాల్సిందే. మరి ఈ రుచికరమైన కేరళ స్టైల్ చికెన్ కర్రీని ఎలా తయారు చేసుకోవాలో చూసేద్దామా?
కావాల్సిన పదార్థాలు:
చికెన్ (బోన్/బోన్లెస్), టమాటా, కొబ్బరినూనె, ఆవాలు, గరం మసాలా, సోంపు, బిర్యానీ ఆకు, లవంగాలు, ఎండుమిర్చి, పచ్చి మిర్చి, కరివేపాకు, ఉల్లిపాయ ముక్కలు, ఉప్పు, పసుపు, అల్లం వెల్లుల్లి పేస్ట్, ధనియాల పొడి, కారం పొడి, జీలకర్ర పొడి, పచ్చి కొబ్బరి, పుదీనా, మిరియాల పొడి
తయారు చేసుకునే విధానం:
స్టవ్ వెలిగించి, కడాయి పెట్టి ముందుగా కొబ్బరినూనె వేయాలి. అది వేడెక్కాక అందులో ఆవాలు వేసి, అది చిటపటలాడిన తర్వాత హోల్ గరం మసాలా, సోంపు, ఎండు మిరపకాయలు, పచ్చి మిరపకాయలు, కరివేపాకు, ఉల్లిపాయ ముక్కలు, ఉప్పు వేసి చక్కగా కలుపుకోవాలి. తర్వాత పసుపు, అల్లం వెల్లుల్లి పేస్ట్, టమాటా ముక్కలు వేసి దాంట్లో ధనియాల పొడి, కారం పొడి, జీలకర్ర పొడి, గరం మసాలా, చికెన్ ముక్కలు కూడా వేసి కుక్ చేసుకోవాలి.
ఎప్పుడైతే చికెన్ టమాటాలతో పాటు ఉడుకుతుందో అప్పుడు పచ్చి కొబ్బరి పేస్ట్ వేసుకొని మరి కొద్దిసేపు కుక్ చేసుకోవాలి. కావాల్సినంత గ్రేవీ వచ్చాక అందులో పుదీనా, మిరియాల పొడి వేసి స్టవ్ ఆఫ్ చేసేయాలి.
రొట్టె ఇలా ట్రై చేయండి..
మైదా పిండితో కాస్తా నూనె, వెన్నె, బేకింగ్ పౌడర్తో రొట్టె చేసుకొని, గసగసాలతో కోటింగ్ చేయాలి. దానిని రెండు వైపులా చక్కలా కాల్చి చికెన్ కర్రీతో తింటే చాలా టెస్టీగా ఉంటుంది.
ఇదీ చూడండి:కండరాలు బలంగా ఉండాలంటే ఇవి తినండి!
