కరోనా మహమ్మారిపై సంఘటితంతోనే స్వావలంబన

ప్రపంచ వ్యాప్తంగా కరోనా వైరస్​ వేగంగా విజృంభిస్తోంది. వైరస్​ బారిన పడిన వారికి చికిత్స అందించే వైద్యులు మహమ్మారి బారిన పడటం ఆందోళన కలిగిస్తుంది. కరోనా పరీక్షల్ని విస్తృతంగా చేపట్టి, వ్యాధిగ్రస్తుల్ని సత్వరం కనిపెట్టి, చికిత్స అందించడం ద్వారా అది ప్రబలకుండా చూసుకోవాలన్న ప్రపంచ ఆరోగ్య సంస్థ హితవును ఇండియా ఇప్పటికిప్పుడు స్వీకరించే పరిస్థితి లేదు. ఇతర దేశాల నుంచి వైద్య పరికరాలను దిగుమతి చేసుకుంటుంది భారత్​. ఈ సంక్లిష్ట పరిస్థితుల్లో దేశీయంగా వైద్య పరికరాల తయారీ సంస్థలు యుద్ధ ప్రాతిపదికన కదలాల్సి ఉన్నా- యాభైశాతం సామర్థ్యం మేరకే అవి పనిచేస్తున్న తీరు నిర్వేదం రగిలిస్తోంది.

ప్రపంచవ్యాప్తంగా ఆరోగ్య ఆత్యయిక స్థితికి కారణమైన కరోనా మహమ్మారి ఇప్పటికే 20లక్షలమందికి పైగా అభాగ్యులపై కోరసాచి, లక్షా 30వేలమందిని కబళించింది. మాయావి వైరస్‌ మానవాళిపై సాగిస్తున్న సమరంలో ముందువరస సైనికులై మోహరించిన వైద్యారోగ్య సిబ్బందీ ప్రాణాంతక కరోనా బారినపడుతుండటమే గుండెల్ని పిండేస్తోంది. దేశ రక్షణ బడ్జెట్లకు దీటుగా ప్రజారోగ్య రంగానికీ భారీ కేటాయింపులు జరిపే బడా దేశాలే కరోనా విలయానికి చిగురుటాకుల్లా వణికిపోతుంటే, ఆరోగ్య సేవారంగం బలహీనంగా ఉన్న ఇండియా పరిస్థితి చెప్పేదేముంది? కరోనా పరీక్షల్ని విస్తృతంగా చేపట్టి, వ్యాధిగ్రస్తుల్ని సత్వరం కనిపెట్టి, చికిత్స అందించడం ద్వారా అది ప్రబలకుండా కాచుకోవాలన్న ప్రపంచ ఆరోగ్య సంస్థ హితవును ఇండియా ఇప్పటికిప్పుడు మన్నించే పరిస్థితి లేదు. వ్యాధి నిర్ధారణకు అవసరమైన కిట్లు మొదలు, ఆసుపత్రి పడకలు, వైద్య ఆరోగ్య సిబ్బందికి కరోనా సోకకుండా కాచుకొనే రక్షణ కవచాల దాకా తీవ్ర కొరత కళ్లకు కడుతున్నప్పుడు- లాక్‌డౌన్‌ నిర్ణయం ద్వారా వ్యాధి ఉరవడికి పగ్గాలేయడం వినా మార్గాంతరమూ లేదు!

ఏప్రిల్‌ ఆరునాటికి- చైనా విరాళంగా ఇచ్చిన వాటితో కలిపి రెండు లక్షల 10వేల లోపు వ్యక్తిగత రక్షణ సామగ్రి (పీపీఈ) కిట్లు అందుబాటులో ఉన్నాయి. మరో కోటీ 50 లక్షల పీపీఈలు, 15 లక్షల వ్యాధి పరీక్షల కిట్లు జన చైనానుంచి అందాల్సి ఉంది. ప్రతి పదిలక్షల జనాభాకు కరోనా పరీక్షల రేటు ఇజ్రాయెల్‌లో 18,600; ఇటలీలో 17,327; ఆస్ట్రేలియాలో 14,300; దక్షిణ కొరియాలో 10,046 ఉంటే ఇండియాలో అది కేవలం 161. చైనానుంచి కరోనా పరీక్ష కిట్లు అందుబాటులోకి వచ్చినా పెరిగే కేసుల ఉద్ధృతికి అవి సరిపోవన్న సంగతి బోధపడుతూనే ఉంది. ఈ సంక్లిష్ట పరిస్థితుల్లో దేశీయంగా వైద్య పరికరాల తయారీ సంస్థలు యుద్ధ ప్రాతిపదికన కదలాల్సి ఉన్నా- యాభైశాతం సామర్థ్యం మేరకే అవి పనిచేస్తున్న తీరు నిర్వేదం రగిలిస్తోంది. తక్షణ దిద్దుబాటు అవసరాన్ని ప్రబోధిస్తోంది!

శతాబ్దపు విలయంగా కరోనా విరుచుకుపడిన వేళ ప్రపంచవ్యాప్తంగా 59 లక్షల మంది నర్సుల కొరత వేధిస్తోందని డబ్ల్యుహెచ్‌ఓ ప్రకటించింది. ఇటలీలో తొమ్మిది శాతం, స్పెయిన్‌లో 14శాతం ఆరోగ్య సిబ్బందికి వైరస్‌ సోకిందంటూ పీపీఈలను అందుబాటులోకి తెచ్చి వారిని కాపాడుకోవాల్సిన అవసరాన్ని నొక్కి వక్కాణించింది. పదివేల కేసుల సంఖ్య దాటిన 22 దేశాల జాబితాలో ఇండియా సైతం చేరిన నేపథ్యంలో- విస్తృత రోగ నిర్ధారణ పరీక్షలు, వైద్య సేవలందించే సిబ్బందికి సత్వరం రక్షణ కవచాలు కరోనాపై పోరులో ప్రాథమ్య అంశాలు కావాలి. చౌక ప్రత్యామ్నాయంగా కాగితం ఆధారిత డయాగ్నస్టిక్‌ కిట్లను దిల్లీలోని ఇన్‌స్టిట్యూట్‌ ఆఫ్‌ జెనోమిక్స్‌ అండ్‌ ఇంటిగ్రేటివ్‌ బయాలజీ (ఐజీఐబీ) సంస్థ రూపొందిస్తోందంటున్నా, అది వచ్చేలోగా కరోనా పరీక్ష కిట్ల తయారీ దేశీయంగానే జరూరుగా సాగేలా కేంద్రం వ్యూహ రచన చెయ్యాలి.

వైద్యులకు అవసరమైన లక్షా 10వేల పూర్తి భద్రతా దుస్తులను రూపొందించడానికి ఆర్డినెన్స్‌ ఫ్యాక్టరీ బోర్డు ముందుకొచ్చింది. 70 లక్షల పీపీఈల కోసం 39 దేశీయ సంస్థలతో, కోటికిపైగా ఎన్‌ 95 మాస్కుల కోసం ముగ్గురు దేశీయ సరఫరాదారులతో ప్రభుత్వం ఒప్పందాలు కుదుర్చుకొంది. లాక్‌డౌన్‌ కారణంగా ఆర్థిక వనరులు సర్దుబాటుకాక పీపీఈల సరఫరా ఒక్కశాతం కూడా జరగలేదంటే ఏమనుకోవాలి? దిగుమతులపైనే ఆధారపడితే నిండా మునుగుతామన్న తెలివిడితో న్యూయార్క్‌ నగరం వారానికి లక్ష కరోనా పరీక్ష కిట్ల తయారీకి సమకట్టింది. ఆ తరహా స్వావలంబన కోసమే నేడు ఇండియా పరిశ్రమించాలి. వెంటిలేటర్ల తయారీకి ఆటొమొబైల్‌ దిగ్గజాల్ని ప్రేరేపించినట్లుగానే- వైద్య ఉపకరణాల రంగానికి పెట్టుబడి దారులు తెరవాలి. ప్రభుత్వ ప్రైవేటు రంగాల సంఘటిత శక్తే కరోనాను కట్టడి చెయ్యగలిగేది!