'చట్టం అందరి చుట్టం కాదు!'
'నిజమే కదా, చట్టం ఎవరి చుట్టమూ కాదు'
'అది తప్పు... అందరికీ చుట్టం కాదు, కొంతమందికి తప్ప!'
'అదెలా- చట్టం ముందు అందరూ సమానమే కదా?'
'అందరూ అంతే సమానం కాదు, కొందరు కొంత ఎక్కువ సమానం'
'అర్థం కాలేదు, తికమకగా ఉంది.'
'అందుకే కదా, అర్థం చేసుకుని అక్కున చేర్చుకున్న వారికి చట్టం దగ్గరి చుట్టమైంది. ఆ వైపే ఆలోచించని వారికి ఎప్పుడోగాని పలకరించని దూరపు చుట్టంలా మారింది.'
'తప్పు చేసిన వారెవరైనా చట్టం ముందు తలవంచాల్సిందే కదా!'
'కానీ, నేతాగ్రేసరులు, అధికార పదవీకారులు, సర్కారీ హోదాధరులు, పలుకుబడితో చెలరేగే పైరవీకారులు... ఇలాంటి ప్రత్యేక వర్గవీరులంతా చట్టం తమను ప్రత్యేకంగా గౌరవించాలని, ఇతరులకు లేని వెసులుబాట్లెన్నో ఉండాలని కోరుకుంటున్నారు.'
'అదెలా కుదురుతుంది... చట్టానికి తరతమ భేదభావాలేమీ ఉండవు కదా?'
'ఉండితీరాలన్నదే ఈ కోటాజీవుల నమ్మకం. రాజస్థాన్‌లో తాగి వాహనం నడిపిన ఓ కుర్రాడిని పోలీసులు ఠాణాకు తీసుకెళ్లారు. ఆ కుర్రాడి మేనత్త అయిన కాంగ్రెస్‌ ఎమ్మెల్యే, తన భర్త, భజన బృందం, అనుచరులతో కలిసి పోలీసుస్టేషన్‌పైకి దండెత్తి నానా హడావుడి చేసి ధర్నాకు దిగారు. కుర్రాళ్లన్నాక ఆ మాత్రం తాగరా ఏమిటి అని తెగ ఆశ్చర్యాన్ని ప్రకటించి, తమలాంటి ప్రముఖుల సంబంధీకులతో ఎలా నడుచుకోవాలో ప్రొటోకాలోపదేశం చేసి, కుర్రాడిని విడిపించుకుని తీసుకుపోయారు. ఇప్పుడెలా చెప్పుకోవాలి... చట్టం అందరి చుట్టమా, కొందరి చుట్టమా?'
'ఏదో ఎక్కడో ఒకచోట ఒకటీఅరా ఉల్లంఘనుల్ని చూసి, మొత్తం వ్యవస్థకే బురదపూస్తే ఎలా?'
'ఎదుటివారికి బురద పూయడం రాజకీయశ్రేణులకు నోటితో పెట్టిన విద్య! ఇలాంటి అదరగొట్టే నైపుణ్య ప్రదర్శన అందరికీ రాదు. అనారోగ్య కారణాలతో బెయిలుపై జైలు నుంచి బయటికొచ్చిన మధ్యప్రదేశ్‌ భాజపా ఎంపీ ఆటలాడుతున్న, నృత్యాలు చేస్తున్న వీడియోలు బయటికి వచ్చాయంటూ ప్రత్యర్థి కాంగ్రెస్‌ నేతలు వేలెత్తి చూపారు. యూపీలో రైతులపై కాన్వాయ్‌ దూసుకెళ్ళిన ఘటనలో కేంద్రమంత్రి కుమారుడి అరెస్టుకు ఆలస్యం చేశారంటూ ప్రతిపక్షం దుమ్మెత్తిపోసింది. తామేం తక్కువంటూ, ఛత్తీస్‌గఢ్‌లో నవరాత్రి వేడుకల్లో పాల్గొన్న భక్తులపై నుంచి ఎస్‌యూవీ దూసుకెళ్ళిన కేసును ఏమార్చారంటూ అక్కడి విపక్ష నేతలు ఆ రాష్ట్ర సర్కారుపై ఆరోపణాస్త్రాలు ఎక్కుపెట్టారు. ఇదంతా, అధికార, విపక్షాల మధ్య అలవాటుగా సాగే బురద ఆట!'
'అందరు నేతలూ అలాగే ఉండరు. చట్టం ముందు మనుషులేమిటి, జంతువులూ సమానమేనని ఉత్తరాఖండ్‌ మంత్రి ఒకరు ఎలుగెత్తారు. మనుషుల్లాగే పడుకొనేందుకు పశువులకూ పరుపులు ఇస్తామని హామీ ఇచ్చారు. రేషన్‌ సరకుల్లా ఇంటింటికీ ఇరవై కిలోల గడ్డి కూడా సరఫరా చేస్తామన్నారు. ఇదంతా మనుషులను, జంతువులను సమానంగా చూడటంవల్లే కదా! అయినా అర్థం చేసుకోని జనాలు ట్రోలింగ్‌లు, మీమ్స్‌తో ఆడుకున్నారు.'
'నేతలతో ఆడుకునే అవకాశం వచ్చినప్పుడు వాడుకోవాల్సిందే. అధికార అహం, ధన దర్పం, పలుకుబడి పైత్యం వంటి శంఖుచక్రాలన్నీ ధరించి పుట్టిన తమకు చట్టాలతో పనేమిటన్నదే ప్రాముఖ్యవర్గీయుల అమాయక సందేహం!'
'అందరిలో అలాంటి వారిని గుర్తించేదెలా?'
'చాలా సులభం! రోడ్డుపై బండిని ఆపగానే- అర్భకులైతే వణికిపోయి కాళ్లూ గడ్డాలు పట్టుకుంటారు. అదృశ్య శంఖుచక్రకిరీటకంకణధారులైతే- నేనెవరో తెలుసా, నా వెనక ఎవరున్నారో తెలుసా, ఫలానా వాళ్లు తెలుసా అంటూ దబాయింపు దరువేస్తారు. అందరిలాగే మమ్మల్నీ పట్టుకుంటావా అని బెదిరిస్తున్నారంటే... అందరితోపాటు, తామూ అంతంత మాత్రంగాళ్లం కాదని, అందరికీ వర్తించే చట్టాలతో తమ జోలికి రావద్దని... చెప్పకనే చెబుతున్నట్లుగా అర్థం చేసుకోవాలి. ఇలాంటి ప్రత్యేకులకు అడ్డంకులనేవి ఉండీలేనట్లుగా ఉండాలన్నమాట!'
'అదెలా...?'
'నాలుగైదు సీసాల్ని స్వీకరించినా ఫరవాలేదనో, తాగి నడిపినా ముద్దుముద్దుగా కసిరి, చెవిలో సుద్దులు వల్లించి పంపించేస్తే సరిపోతుంది. అచ్చోసిన ఆంబోతులా బండిపై బలాదూరుగా దూసుకెళ్ళవచ్చని, ఎర్రలైటుకూ ఆగక్కర్లేదని, నడిరోడ్డులోనైనా నిలుపుకొనేలా నిబంధనలకు గంతలు కడితే సరి'
'సామాన్యులు బండి తీస్తే- వంద వంకలు పెడుతూ, ఛాయాచిత్ర కళా నైపుణ్యంతో వెయ్యి ఫొటోలు తీసే పోలీసులు... ఇలాంటి వారిని వదిలేయడం చట్టవ్యతిరేకం కదా?'
'తమ కాళ్లకు అడ్డం పడుతున్న నిబంధనల్ని ఎంతో మర్యాదగా పక్కనపెడుతూ, ఒద్దికగా సాగుతుంటే ని'బంధనాల'తో వేధిస్తారేమిటనేకదా వారి ఆక్రోశం!'
'అలాగైతే, ఆ వెసులుబాట్లేవో అందరికీ ఇస్తే పోలా?'
'అదెలా కుదురుతుంది! అప్పుడంతా ఒక్కటే అవుతారు. ప్రముఖులు అనే ప్రత్యేక ప్రఖ్యాతి వైఫైలా ప్రతిక్షణం అనుసంధానమై ఉంటేనే వారి బతుకులకు విలువ. అందుకనే చట్టాలు అందరికీ చుట్టాలవ్వకూడదు. అవసరమైనప్పుడల్లా కొందరికే చుట్టాల్లా మారితేనే క్షీరనీర న్యాయం పదిలంగా పరిఢవిల్లుతుంది!'
'హతోస్మి!'
- శ్రీనివాస్‌ దరెగోని
ఇవీ చూడండి:
