'సరిహద్దుల్లో ఒక్క బుల్లెట్​ పేలినా.. ఇక యుద్ధమే'

భారత్​- చైనా మధ్య నెలకొన్న ఉద్రిక్త పరిస్థితులపై లెఫ్టినెంట్​ జనరల్ ​(విశ్రాంత) బి. జైశ్వాల్​ స్పందించారు. సరిహద్దులో ఒక్క బుల్లెట్​ పేలినా.. అది యుద్ధానికే దారి తీస్తుందని వ్యాఖ్యానించారు. ఆయనతో 'ఈటీవీ భారత్'​ జరిపిన ప్రత్యేక ఇంటర్వ్యూ మీకోసం...

చైనా సరిహద్దుల్లో ఒక్క బుల్లెట్‌ పేలినా... అది ఇరు దేశాల మధ్య పూర్తిస్థాయి యుద్ధానికి దారి తీస్తుందని లెఫ్టినెంట్‌ జనరల్‌ (విశ్రాంత) బి.ఎస్‌.జైశ్వాల్‌ స్పష్టం చేశారు. వాస్తవాధీన రేఖ(ఎల్‌ఏసీ)ను చైనా 1959లో తొలిసారిగా రూపొందించిందని, తరువాత మళ్లీమళ్లీ మారుస్తోందని ‘ఈటీవీ భారత్‌’ ప్రత్యేక ప్రతినిధి బిలాల్‌ భట్‌కు ఇచ్చిన ఇంటర్వ్యూలో ఆయన పేర్కొన్నారు. భారత సైన్యంలో ఉత్తర కమాండ్‌కు నేతృత్వం వహించిన జైశ్వాల్‌కు ఎల్‌ఏసీ, ఆ ప్రాంతంలోని సైనిక వ్యవహారాలపై మంచి అవగాహన ఉంది. ఇంటర్వ్యూ వివరాలిలా ఉన్నాయి.

చైనా సరిహద్దుల్లో ఇటీవల గస్తీపాయింట్‌(పీపీ)14, గల్వాన్‌ లోయ వంటి చోట్ల ఏం జరిగిందనే విషయంలో రకరకాల వార్తలు వినిపిస్తున్నాయి? ఇంతకీ క్షేత్రస్థాయిలో వాస్తవ పరిస్థితి ఏమిటి?

ఎల్‌ఏసీ విషయానికొస్తే, కొన్నిచోట్ల ఇరు దేశాలూ దాన్ని గుర్తించడం లేదు. 1959లో యుద్ధం ముగిసిన తరవాత చైనా ఆక్రమించుకున్న ప్రాంతాల వెనక భాగాలు, వారు ఉపసంహరించుకున్న ప్రాంతాలు వాస్తవాధీన రేఖలా మారాయి. 1959లో ఓ రేఖను నిర్దేశించిన చైనా, 1960లో పశ్చిమ దిశగా మరో రేఖను గీసింది. ఎల్‌ఏసీ పటంపై సంతకాలు జరగలేదు. రేఖ చెల్లుబాటు అస్పష్టమే. మొత్తం గల్వాన్‌ లోయ తమదేనంటూ చెప్పుకోవాలనేది చైనా ఉద్దేశం. ఎందుకంటే, అనుకూలమైన స్థానంలో ఉంటేనే మన దౌలత్‌బేగ్‌ ఓల్డీ(డీబీఓ) రోడ్డుపై అంతరాయాలు సృష్టించే అవకాశం కలుగుతుంది. ఇకపోతే, ఆ ప్రాంతంలో యథాతథ స్థితి ఉంది. కానీ, గస్తీపాయింట్‌(పీపీ)14 వద్ద మాత్రం చైనీయులే ఉన్నారు. ముందుగానే వారక్కడ ఉన్నారు. అక్కడ ఎల్‌ఏసీపై స్పష్టత లేదు.

ఎల్‌ఏసీపై ఒప్పందం ప్రకారం బలగాలు ఆయుధాలతో అక్కడికి వెళ్లకూడదు. మరి, సైనికులు ఆయుధాలు లేకుండానే వెళ్తారా?

సైనిక బలగాలు ఆయుధాల్ని వీపులపై వేలాడదీసుకుంటారు. తుపాకుల మొనలు నేలవైపు ఉండాలి. బుల్లెట్లు దుస్తుల్లోని సంచుల్లో ఉంచుకుంటారు. ఎల్‌ఏసీ ఒప్పందం ప్రకారం పరస్పర ఘర్షణల్లో ఆయుధాల్ని ఉపయోగించకూడదు. అయితే, దాడి జరిగినప్పుడు ఉపయోగించకూడదని ఎక్కడా చెప్పలేదు. ఆత్మరక్షణ కోసం అవసరమైనప్పుడు ఆయుధాన్ని ఉపయోగించాల్సిందే. పీపీ14 వద్ద పర్వత మార్గంలో ఏ మాత్రం జారిపడినా కిందుండే నదిలో పడాల్సిందే. అక్కడదే జరిగింది. చాలామంది నదిలో పడిపోయారు. చీకటిలో మెరుపు దాడి జరిగింది. ఎదుర్కొనేందుకు సంసిద్ధమయ్యేలోపే దాడి జరిగిపోయింది.

ఇటీవలి దాడికి చాలా రోజుల ముందుగానే ఆ ప్రాంతంలో నిర్మాణాలు జరిగినట్లు చెబుతున్నారు... ముందుగా సమాచారం అందలేదా?

మనకు అన్నివైపుల నుంచి సమాచార వనరులు ఉన్నాయి. అయితే, ఎక్కడో సమాచార లోపం జరిగి ఉంటుందని భావిస్తున్నాను. చైనా సైనికులు గల్వాన్‌ లోయ ముందుభాగం వరకూ వచ్చారు. ఆ ప్రాంతంలో నిఘా కెమెరాలను నెలకొల్పాలనే డిమాండ్‌ ఎప్పట్నుంచో ఉంది. చైనా బలగాలు ఏర్పాటు చేసుకున్న తరహాలో స్టాండాఫ్‌ కెమెరాల అవసరం మనకీ ఉంది. అక్కడి నిర్మాణాల గురించి తెలిసినప్పటి నుంచీ మనం మరింత జాగ్రత్తగా, సంసిద్ధమై ఉండాల్సింది. అయితే సరిహద్దుల్లో నిర్దిష్టమైన ప్రొటోకాల్‌ను అనుసరించాల్సి ఉంటుంది. దాడి జరిగేంత వరకూ ఆయుధాల్ని ఉపయోగించడానికి వీల్లేదు.

గస్తీపాయింట్‌14 వద్ద చైనా సైనికులు ఉన్నట్లు చెబుతున్నారు. మన గస్తీ పరిస్థితి ఏమిటి? ఏ పాయింట్‌ వరకూ మన బలగాలు వెళ్లగలుగుతున్నాయి?

మనం పాంగాంగ్‌ సరస్సు వద్ద ఉండే ఫింగర్‌ 4 ప్రాంతాన్ని దాటి వెళ్లకూడదు. ఫింగర్‌ 4 వద్ద మనకు స్థావరం ఉంది. వారు ఫింగర్‌ 4 వద్ద, దాని పైభాగంలోని పర్వత ప్రాంతానికి వచ్చి చేరారు. పీపీ14 అనేది రేఖ పక్కనే ఉంది. వాళ్లు పీపీ14 పక్కనే ఉండే అవకాశం ఉంది. మనం అక్కడికి వెళ్లినట్లయితే, తాజాగా జరిగిన ఘర్షణ తరహాల్లో ఉద్రిక్త ఘటనలు పెరిగే అవకాశం ఉంది. ఇప్పటిదాకా సైనిక పరంగా సమస్యపై చర్చించడం జరిగింది. నా అభిప్రాయం వరకైతే అక్కడి వెళ్లకూడదు. అక్కడికి సమీపంలో మరెక్కడైనా పొజిషన్‌ తీసుకోవాలి. అప్పుడైతే, వారు అంతకుమించి ముందుకు కదలరు. వారున్న చోటుదాకా వెళ్తే ఘర్షణ తప్పదు. ఉద్రిక్తతలు మరింతగా పెరుగుతాయి.

గస్తీపాయింట్‌ 14ను చైనా ఆక్రమించిందా?

చైనా సైనికులు ఇటువైపు వచ్చినప్పుడు అది తమ ప్రాంతం అని చెప్పేవారు. ప్రస్తుతం గస్తీపాయింట్‌ 14 వద్ద మన సైనికులు లేరు. అక్కడ చైనా సైనికులు ఉన్నారు. వారు అక్కడ్నుంచి వెనక్కి వెళ్లిపోలేదు. కోర్‌ కమాండర్ల స్థాయిలో జరిగిన సమావేశంలో ఏకాభిప్రాయం కుదిరింది. వారు అక్కడి నుంచి వెళ్లిపోవాల్సి ఉంది. పీపీ14 ప్రాంతం పరిసరాల్లోనే వారు తిష్టవేసుకుని ఉన్నట్లు తెలుస్తోంది.