సీఎం పోస్ట్ ఎవరికి? డీకే ఊరుకుంటారా? పార్టీ చీలే ప్రమాదమెంత?

కర్ణాటక ఫలితం తేలిపోయింది. కాంగ్రెస్​దే మెజారిటీ అని ఫలితం స్పష్టం చేసింది. మరి ముఖ్యమంత్రి పదవిని చేపట్టేదెవరు? పార్టీలో కీలక నేతలుగా ఉన్న సిద్ధరామయ్య, డీకే శివకుమార్​లో సీఎం పదవి దక్కేదెవరికి?

• మెజారిటీ సీట్లు పట్టేశారు..
• అధికారం చేతుల్లోకి వచ్చి చేరింది..
• సీఎం పదవి ఎవరిదన్నదే ఇప్పుడు ప్రశ్న..
• సిద్ధ వర్సెస్ డీకే... ఇద్దరి మధ్యే ఫైట్..

Karnataka election results : ఎన్నికలను దృష్టిలో పెట్టుకొని ఇంతకాలం విభేదాలు బయటపడకుండా చూసుకున్న సిద్ధరామయ్య, డీకే శివకుమార్​ వ్యూహం ఏంటి? సీఎం పదవిని ఒడిసిపట్టేదెవరు? పదవిని త్యాగం చేసేది ఎవరు? కర్ణాటక కాంగ్రెస్​లో వర్గపోరు మళ్లీ బయటపడుతుందా? అధిష్ఠానం ఏ నిర్ణయం తీసుకుంటుంది? కాంగ్రెస్​కు మెజారిటీ సీట్లు వచ్చిన నేపథ్యంలో ఇలాంటి ఎన్నో ఆసక్తికరమైన ప్రశ్నలు ఉత్పన్నమవుతున్నాయి.

ఎన్నికలకు ముందు కర్ణాటకలో కాంగ్రెస్ పార్టీ ఐకమత్యంగానే కనిపించినా.. అంతకుముందు వర్గపోర్లు నడిచాయన్నది కాదలేని వాస్తవం. ఆ రాష్ట్ర కాంగ్రెస్​లో ప్రధానంగా రెండు వర్గాలు ఉన్నాయి. మాజీ సీఎం సిద్ధరామయ్యకు మద్దతు ఇచ్చేది కొందరైతే.. కర్ణాటక కాంగ్రెస్ అధ్యక్షుడు డీకే శివకుమార్​కు అండగా ఉండేది మరికొందరు. సిద్ధరామయ్య ఇప్పటికే ముఖ్యమంత్రిగా పనిచేయగా.. డీకే శివకుమార్​కు ఆ అనుభవం లేదు. ఈ నేపథ్యంలో ఈసారి ఎవరికి ఈ హోదా వరిస్తుందనేది ఆసక్తికరంగా మారింది.

సిద్ధరామయ్య, డీకే శివకుమార్

• సిద్ధరామయ్య బలాలు
  • పార్టీలో సీనియర్ నాయకుడు
  • ప్రభుత్వాన్ని నడిపిన అనుభవం
  • మచ్చలేని రాజకీయ జీవితం
  • పార్టీ నేతల నుంచి అధిక మద్దతు
  • ఇవే చివరి ఎన్నికలు అని స్వీయప్రచారం
• సిద్ధరామయ్య బలహీనతలు
  • బయటి నుంచి వచ్చిన వ్యక్తి అనే పేరు

సిద్ధరామయ్య

• డీకే శివకుమార్ బలాలు
  • పార్టీని అధికారంలోకి తెచ్చిన ఘనత
  • పార్టీకి ఆర్థికంగా అండగా ఉండటం
  • సోనియా గాంధీకి నమ్మకస్తుడనే పేరు
  • పార్టీలో ట్రబుల్ షూటర్​గా ఉండటం
• డీకే శివకుమార్ బలహీనతలు
  • మనీలాండరింగ్, పన్ను ఎగవేత కేసులు
  • మెడపై సీబీఐ, ఈడీ కత్తి

డీకే శివకుమార్

సామాజిక కోణంలో చూస్తే..
Karnataka cm name : కర్ణాటకలో సామాజిక వర్గాలను ఆధారంగా చేసుకుంటే.. లింగాయతల తర్వాతి స్థానంలో ఒక్కలిగలు ఉంటారు. కాంగ్రెస్ అధ్యక్షుడు డీకే శివకుమార్ ఒక్కలిగ వర్గానికి చెందిన వ్యక్తి. తాజా ఎన్నికల్లో పాత మైసూరు ప్రాంతంలోనూ కాంగ్రెస్​ బలంగా పుంజుకుంది. జేడీఎస్​ను కాదని కాంగ్రెస్​కే ఒక్కలిగలు పట్టం కట్టినట్లు ఫలితాలను బట్టి తెలుస్తోంది. స్వయంగా ఒక్కలిగ నేత అయిన డీకేకు ఈ విజయంలో కొంతైనా వాటా దక్కుతుంది. మరోవైపు, సిద్ధరామయ్య కురుబ సామాజిక వర్గానికి చెందిన నేత. లింగాయత, ఒక్కలిగల తర్వాత రాష్ట్రంలో మూడో అతిపెద్ద సామాజిక వర్గం ఇదే. అంతేకాకుండా.. అహింద (మైనారిటీలు, బీసీలు, దళితులు) వర్గాలను ఏకం చేసి కాంగ్రెస్ ఓటు బ్యాంకుగా మార్చిన ఘనత సిద్ధరామయ్య సొంతం.

ప్రజా, ఆర్థికబలం!
Karnataka election results 2023 : ప్రజాబలంలో ఇద్దరూ తిరుగులేని నాయకులే. సీనియర్ నాయకుడిగా సిద్ధరామయ్య ఈ విషయంలో ఇంకాస్త ముందంజలో ఉంటారన్నది విశ్లేషకుల మాట! మాస్ లీడర్​గా సిద్ధరామయ్యకు ప్రజల్లో ఆదరణ అధికంగా ఉంది. కర్ణాటక రాష్ట్ర రాజకీయాలు అనగానే యడియూరప్ప, సిద్ధరామయ్య పేర్లే వినిపిస్తుంటాయి. ప్రస్తుతం యడ్డీ రాజకీయాలకు దూరమైన నేపథ్యంలో రాష్ట్రంలో తిరుగులేని లీడర్ సిద్ధరామయ్యే. ఇటీవలి కాలంలో డీకే సైతం రాష్ట్రవ్యాప్తంగా పేరు సంపాదించారు. పార్టీలో ట్రబుల్ షూటర్​గా ఎదిగారు. ఆర్థికపరంగా బలమైన నేత కావడం డీకే శివకుమార్ ప్లస్ పాయింట్.

అధిష్ఠానానికి ప్రియనేత ఎవరు?
కాంగ్రెస్ అధినాయకత్వమైన గాంధీ కుటుంబంతో ఇద్దరు నేతలకు మంచి సంబంధాలు ఉన్నాయి. అయితే, డీకే శివకుమార్​కు సోనియా గాంధీ, రాహుల్ గాంధీతో వ్యక్తిగతంగా సన్నిహిత సంబంధాలు ఉన్నాయి. 2019లో మనీలాండరింగ్ కేసులో అరెస్టై తిహాడ్ జైలులో ఉన్నప్పుడు స్వయంగా సోనియా వెళ్లి డీకేను కలిశారు.

సోనియా, రాహుల్​తో డీకే (పాత చిత్రాలు)

పార్టీలో నేతల మాటేంటి?
పార్టీలో ఇద్దరు నేతలకు ఆదరణ ఉంది. స్వల్ప మెజారిటీతో గెలిస్తే సిద్ధరామయ్య ముఖ్యమంత్రి అయితేనే బాగుంటుందని ఎన్నికలకు ముందు కాంగ్రెస్ ఎమ్మెల్యేలు అభిప్రాయపడ్డారు. అనుభవం ఉన్న ఆయన అయితేనే ప్రభుత్వాన్ని మెరుగ్గా నడిపించగలరని చెప్పుకొచ్చారు. ప్రత్యర్థి పార్టీలకు టార్గెట్ అవ్వకుండా ఉండాలంటే.. సౌమ్యుడైన సిద్ధరామయ్యనే ఎంపిక చేయాలని అభిప్రాయం వ్యక్తం చేశారు. అయితే, ఇప్పుడు కాంగ్రెస్ పార్టీ మంచి మెజారిటీనే సాధించింది. మెజారిటీకి 113 సీట్లు అవసరమైతే.. కాంగ్రెస్ 130కి పైగా సీట్లు గెలుచుకుంది. ఈ నేపథ్యంలో అధిష్ఠానం ఎవరివైపు మొగ్గుచూపుతుందో ఆసక్తికరంగా మారింది.

ప్రజలు ఎవరివైపు ఉన్నారు?
ప్రజాభీష్టం ప్రకారం చూస్తే సిద్ధరామయ్యదే పైచేయి అని ఇప్పటికే ఓ సర్వే చాటి చెప్పింది. అధిక శాతం మంది ప్రజలు సిద్ధరామయ్యనే ముఖ్యమంత్రిగా చూడాలని అనుకుంటున్నట్లు తేలింది. ఈ నేపథ్యంలో.. సిద్ధరామయ్యను ముఖ్యమంత్రిని చేస్తే ప్రజా నాయుకుడికే పదవి అప్పగించామని కాంగ్రెస్ చెప్పుకోవచ్చు.

సిద్ధరామయ్య

• సీఎంగా ఎవరు కావాలని అడిగితే ప్రజల స్పందన ఇదే..
  • సిద్ధరామయ్య- 42%
  • బసవరాజ్ బొమ్మై- 24%
  • కుమారస్వామి- 17%
  • డీకే శివకుమార్- 3%

తిరుగుబాటు ఉంటుందా?
ఒకవేళ సిద్ధరామయ్యకు సీఎం పదవి ఇస్తే.. డీకే శివకుమార్, ఆయన వర్గం ఏం చేస్తుందనేది ఆసక్తికరంగా మారింది. ప్రచారం సమయంలోనే సిద్ధరామయ్యకు కౌంటర్​గా సీఎం పదవికి మల్లికార్జున ఖర్గే పేరును తెరపైకి తెచ్చింది డీకే వర్గం. ఈ నేపథ్యంలో సిద్ధను సీఎం చేస్తే.. పార్టీపై అలకబూని తిరుగుబాటుకు డీకే యత్నిస్తారా అనేది చర్చనీయాంశమవుతోంది. అయితే, పార్టీలో టాప్ లీడర్​గా ఉన్న ఆయన.. తిరుగుబాటు చేయకపోవచ్చని విశ్లేషకులు చెబుతున్నారు. తనపై కేసులు పెట్టించి, జైలుకు పంపించిన బీజేపీపై డీకే శివకుమార్ వ్యక్తిగతంగా కక్ష పెంచుకున్నారని సమాచారం. అదీకాకుండా.. తనకు అండగా ఉన్న పార్టీ అధిష్ఠానానికే డీకే నిబద్ధతతో ఉండొచ్చని రాజకీయ పండితులు అంటున్నారు.

డీకే శివకుమార్

• ఇదీ చదవండి: