భారత్ పూర్తిగా స్వదేశీ పరిజ్ఞానంతో తయారు చేసిన మొట్టమొదటి విమాన వాహక యుద్ధ నౌక 'ఐఎన్‌ఎస్‌ విక్రాంత్'ను ప్రధాని నరేంద్ర మోదీ శుక్రవారం నౌకాదళంలో ప్రవేశపెట్టనున్నారు. 40,000 టన్నులకుపైగా బరువుండే విమాన వాహక నౌకలను సొంతంగా తయారు చేసే సామర్థ్యం కలిగిన ఆరు దేశాల్లో ఇప్పుడు భారతదేశమూ ఒకటిగా నిలిచింది. ఇంతకుముందు బ్రిటిష్‌ విమాన వాహక నౌకలు హెర్క్యులిస్‌, హెర్మిస్‌లను భారతదేశం స్వీకరించి వాటికి విక్రాంత్, విరాట్‌ అని పునఃనామకరణం చేసింది. విక్రాంత్ 1961లో, విరాట్‌ 1987లో భారత నౌకాదళంలో చేరాయి. ఇప్పుడు అవి పాతబడిపోవడంతో సర్వీసు నుంచి తొలగించారు. 2013లో రష్యా నుంచి కొనుగోలు చేసిన 44,500 టన్నుల విక్రమాదిత్య ఒక్కటే ఇప్పుడు భారత నౌకాదళంలో మిగిలిన ఏకైక విమాన వాహక యుద్ధ నౌక. దానిపై 24 మిగ్‌-29కె యుద్ధ విమానాలు, ఆరు జలాంతర్గామి వినాశక హెలికాప్టర్లు ఉన్నాయి.
INS Vikrant 2022 details : విక్రమాదిత్యకు తోడుగా నేడు రంగప్రవేశం చేస్తున్న రెండో విమాన వాహక నౌక 43,000 టన్నుల విక్రాంత్ 2023 నాటికి పూర్తిస్థాయిలో పోరాట విధులు నిర్వహించగలదు. బ్రిటిష్‌ నౌకగా మొదలై, 1961లో విక్రాంత్‌గా మారి 1997లో విధుల నుంచి తప్పుకొన్నదాని స్థానంలో వస్తున్న కొత్త ఎయిర్‌క్రాఫ్ట్‌ క్యారియర్‌కు తిరిగి విక్రాంత్ అని నామకరణం చేశారు. ఇది 30 యుద్ధ విమానాలను, అధునాతన హెలికాప్టర్లను తీసుకెళ్లగలదు. భారత్ సొంతంగా తయారు చేసిన తేజస్‌ యుద్ధ విమానం, అడ్వాన్స్డ్‌ లైట్‌ హెలికాప్టర్లనూ విక్రాంత్‌పై మోహరించవచ్చు. భారతదేశ తీరం నుంచి సుదూర సముద్ర జలాల్లోనూ పోరాడే సత్తా విక్రాంత్‌కు ఉంది. శత్రు జలాంతర్గాములను, విమానాలను అది చిత్తు చేయగలదు. ఆత్మరక్షణకే కాక ఎదురు దాడికీ అది అమోఘ అస్త్రమని నౌకాదళం చెబుతోంది.
భారత్, చైనా బలాబలాలు
చైనా తన పెరడులా భావించే పసిఫిక్‌ మహాసముద్రంలో ప్రవేశించడానికి, అక్కడ అవసరమైతే దాడి చేయడానికి విమాన వాహక నౌక కీలకం. ఇంతవరకు ఈ సత్తా అమెరికా, రష్యా, బ్రిటన్‌, ఫ్రాన్స్‌లకు మాత్రమే ఉందని, ఇప్పుడు భారత్ కూడా విమాన వాహక నౌక ద్వారా ఆ సామర్థ్యాన్ని సమకూర్చుకొంటోందని బీజింగ్‌కు అర్థమయింది. 1961 నుంచే విమాన వాహక నౌకలను నిర్వహించిన అనుభవం భారత్‌కు ఉంది. ఇతర నౌకల కన్నా విమాన వాహక నౌకను నడపడం, యుద్ధంలో దాన్ని ఉపయోగించడం ఎక్కువ సంక్లిష్టమైన కార్యం. దాన్ని నిర్వహించడానికి అనుభవజ్ఞులైన నిపుణులు కావాలి. 1971 యుద్ధంలో బంగాళాఖాతంలో పాత విక్రాంత్ ద్వారా అలాంటి అనుభవం, సామర్థ్యం భారత్‌కు చేకూరాయి. విక్రాంత్ నుంచి దూసుకెళ్ళిన యుద్ధ విమానాలు, హెలికాప్టర్లు అప్పటి తూర్పు పాకిస్థాన్‌(నేటి బంగ్లాదేశ్‌)లోని కాక్స్‌ బజార్‌, చిట్టగాంగ్‌, ఖుల్నా, మోంగ్లా రేవులపై బాంబులు కురిపించాయి. ఆ రేవులను దిగ్బంధించడంతో తూర్పు పాకిస్థాన్‌ నుంచి పాక్‌ సేనలు సముద్ర మార్గంలో తప్పించుకునే వీలు లేకుండా పోయింది. అందుకే సుమారు లక్షమంది పాక్‌ సైనికులు భారత్‌కు లొంగిపోయారు. ఇప్పటివరకు రెండు విమాన వాహక నౌకలు- లియావోనింగ్‌, షాండోంగ్‌లను కలిగి ఉన్న చైనా తాజాగా మూడో నౌక ఫ్యూజియాన్‌ను జలప్రవేశం చేయించింది. రాబోయే దశాబ్ద కాలంలో మరి రెండింటిని రంగప్రవేశం చేయించాలనుకొంటోంది. 2030కల్లా చైనా వద్ద అయిదారు విమానవాహక యుద్ధ నౌకలు ఉండవచ్చు. అప్పుడు హిందూ మహాసముద్రంలోనూ నిరాటంకంగా సంచరించే సామర్థ్యం చైనాకు సమకూరుతుంది.