'శాశ్వత స్వేచ్ఛ' కోసమంటూ సమరశంఖం పూరించి అఫ్గాన్‌ గడ్డపై అడుగుపెట్టిన అమెరికా- రెండు దశాబ్దాల దరిమిలా రక్తసిక్త రిక్తహస్తాలతో రణరంగాన్ని వీడుతోంది! రెండు లక్షలకు పైగా ప్రాణాలు, రెండు లక్షల కోట్ల డాలర్ల నిధులను హరించిన యుద్ధక్షేత్రం నుంచి ఆగమేఘాలపై నిష్క్రమిస్తోంది. ముష్కర మూకలపై ముప్పేట దాడులకు మూలకేంద్రమైన కీలక బగ్రామ్‌ వైమానిక స్థావరం నుంచి సంకీర్ణ సేనలు మూడు రోజుల క్రితం మూటాముల్లే సర్దేశాయి. ఆగస్టు మాసాంతం కల్లా నిష్క్రమణ పర్వాన్ని పూర్తిచేస్తామని ఆ వెంటనే పెంటగాన్‌ వర్గాలు ప్రకటించాయి. తాలిబన్లతో అర్థరహిత శాంతి ఒప్పందానికి తలొగ్గిన డొనాల్డ్‌ ట్రంప్‌ సర్కారుపై నిరుడు విమర్శలెన్నో వ్యక్తమయ్యాయి. అఫ్గాన్‌ భవిష్యత్తును బలిపీఠంపైకి నెడుతున్నారంటూ అంతర్జాతీయంగా ఆందోళనలు రేగాయి. బైడెన్‌ అధ్యక్షులయ్యాక బలగాల ఉపసంహరణకు సెప్టెంబర్‌ 11ను తుది గడువుగా నిర్దేశించి- ఆ మేరకు కార్యాచరణ ప్రణాళికను పట్టాలెక్కించారు. అందుకనుగుణంగా అగ్రరాజ్యమెంత వడివడిగా వెనకబాట పడుతోందో అంత వేగంగా అఫ్గాన్‌పై తాలిబన్‌ తాచుపాముల పడగనీడ పరుచుకుంటోంది.
'శత్రువులను నిలువరించగలిగిన శక్తిసామర్థ్యాలు అఫ్గాన్‌ ప్రభుత్వానికి ఉన్నాయి' అన్న బైడెన్‌ వ్యాఖ్యలకు భిన్నంగా తరుముకొస్తున్న తాలిబన్‌ తండాల ధాటికి అష్రాఫ్‌ ఘనీ సర్కారు ఎదురు నిలువలేకపోతోంది. దేశంలోని 407 జిల్లాల్లో ప్రస్తుతం ప్రజాప్రభుత్వం అధీనంలో ఉన్నవి 78 మాత్రమేనంటున్న అంతర్జాతీయ పరిశీలకులు.. అఫ్గానిస్థాన్ మరోమారు అనాగరిక ఏలుబడిలోకి జారిపోయే దుర్దినమెంతో దూరంలో లేదని హెచ్చరిస్తున్నారు. తమ కబంధ హస్తాల్లోకి వచ్చిన ప్రాంతాల్లో పౌరస్వేచ్ఛకు ఛాందసవాద సంకెళ్లు బిగిస్తూ తాలిబన్లు ఇప్పటికే పేట్రేగిపోతున్నారు. మధ్యయుగాల నాటి రాక్షసత్వాన్ని పుణికిపుచ్చుకొన్న ముల్లా ఒమర్‌ వారసులు అధికారంలోకి రావడం తథ్యమని తేలిపోతున్న తరుణంలో దాదాపు నాలుగు కోట్ల అఫ్గానీల భవితే అగమ్యగోచరమవుతోంది. తాలిబన్లకు పాకిస్థాన్‌ వెన్నుదన్ను, ఆ దేశాన్ని అడ్డంపెట్టుకుని అఫ్గాన్‌లో చక్రం తిప్పాలనుకుంటున్న చైనా వ్యూహం.. వెరసి- ప్రస్తుత పరిణామాలన్నీ ఇండియాకు కంటి మీద కునుకును దూరం చేసేవే! అఫ్గానిస్థాన్‌లో భారత ప్రయోజనాలను పరిరక్షించుకోవడంపై కేంద్రం నిశితంగా దృష్టి సారించాల్సిన తరుణమిది!