పట్టపగ్గాల్లేని సైబర్‌ నేరాలు

దేశంలో సైబర్​ నేరాల హవా పట్టాపగ్గాల్లేకుండా కొనసాగుతోంది. కర్ణాటక, ఉత్తర్​ప్రదేశ్​, మహారాష్ట్రల తర్వాత తెలుగు రాష్ట్రాల్లో సైబర్​ దాడులు పెరుగుతున్నట్టు గణాంకాలు స్పష్టం చేస్తున్నాయి. ఏడాది వ్యవధిలోనే దేశవ్యాప్తంగా సైబర్‌ నేరాల ఉద్ధృతి 5 రెట్లకు ఎగబాకిందని జాతీయ భద్రతా సలహాదారు అజిత్​ డోభాల్​ గతంలో వెల్లడించారు. ఈ నేపథ్యంలో రాష్ట్రాల మధ్య నిరంతర సమాచార మార్పిడితో ఎక్కడికక్కడ చోర బృందాల భరతం పట్టేలా చేయాలి. ఉమ్మడి కార్యదళం అవతరణ- అంతర్జాల ఉగ్రవాద పీడకు సరైన విరుగుడు అవుతుంది!

దేశంలో సైబర్‌ నేరాల తీవ్రత ఏటికేడాది ఇంతలంతలవుతున్నట్లు గణాంకాలు చాటుతున్నాయి. నమోదైన నికర కేసుల ప్రాతిపదికన కర్ణాటక, యూపీ, మహారాష్ట్రలను వెన్నంటి ఉభయ తెలుగు రాష్ట్రాలూ సైబర్‌ చోరగణం విజృంభణను కళ్లకు కడుతున్నాయి. 2019తో పోలిస్తే 2020 సంవత్సరంలో తెలంగాణ వ్యాప్తంగా సైబర్‌ అకృత్యాలు రెండింతలై నాలుగున్నర వేలకు పైబడినట్లు రాష్ట్ర డీజీపీ తాజా ప్రకటన చాటుతోంది. అటు మహారాష్ట్రలో ఒక్క పుణె నగరంలోనే కేవలం ఏడాది వ్యవధిలో రెట్టింపైన కేసుల సంఖ్య దాదాపు 14వేలకు ఎగబాకడం నిశ్చేష్టపరుస్తోంది. 'డిజిటల్‌ ఇండియా' స్వప్నసాకారం మాట ఎలాగున్నా- దేశం నలుమూలలా ఆన్‌లైన్‌ కంతల దన్నుతో సైబర్‌ నేరాలు 64శాతం మేర పెచ్చరిల్లినట్లు అధ్యయన నివేదికలు విశ్లేషిస్తున్నాయి. అంతర్జాలాన్ని, స్మార్ట్‌ఫోన్లనే స్వీయలాఘవ ప్రదర్శన వేదికలుగా మలచుకుంటున్న చోరముఠాల చేతివాటం మూలాన 2019లో దేశీయంగా వాటిల్లిన నష్టం సుమారు లక్షా పాతికవేల కోట్ల రూపాయలని అంచనా. కేసుల సంఖ్యతో పాటు నష్ట పరిమాణమూ పెరుగుతోంది.

ఏడాదిలోనే 5రెట్లు..

వాస్తవానికి జాతీయ నేర గణాంకాల సంస్థ (ఎన్‌సీఆర్‌బీ) మదింపు వేసిన దానికన్నా చోరులపాలైన సొత్తు ఎంతో అధికమన్న వాదనలకు జాతీయ భద్రతా సలహాదారు అజిత్‌ డోభాల్‌ ఆమధ్య గట్టిగా వత్తాసు పలికారు. ఏడాది కాలంలో దేశవ్యాప్తంగా సైబర్‌ నేరాల ఉద్ధృతి అయిదింతలైందన్న ఆయన ధ్రువీకరణ- అడ్డూఆపూ లేకుండా నయా నేరగాళ్లు చెలరేగిపోతున్న వైనాన్ని ప్రస్ఫుటీకరిస్తోంది. రుణ యాప్‌ల పేరిట కొన్ని నెలల వ్యవధిలోనే రూ. 21 వేలకోట్ల మేర చేతులు మారి దేశ సరిహద్దులే దాటిపోయిన బాగోతం- సైబర్‌ నేరాలు ఎంతగా చిలవలు పలవలు వేసుకుపోతున్నాయో ఎలుగెత్తుతోంది. కొవిడ్‌ సంక్షోభాన్ని మహదవకాశంగా దొరకబుచ్చుకొని పలు రాష్ట్రాల్లో సైబర్‌ ముష్కరులు చెలరేగిపోతున్న దృష్ట్యా- జాతీయ స్థాయిలో ముప్పును ఎదుర్కొనే పకడ్బందీ వ్యూహం అత్యావశ్యకత ఇక ఎంతమాత్రం ఉపేక్షించరానిది.

'వర్క్​ ఫ్రమ్​ హోం'తో పెరిగిన ముప్పు..

ఆధునిక సాంకేతిక ప్రపంచం కంప్యూటర్‌ మీటలు, స్మార్ట్‌ఫోన్లపైనే ప్రస్థానం సాగిస్తోంది. దురదృష్టవశాత్తు, ఆన్‌లైన్‌ లావాదేవీల రాశి, విభాగాల విస్తరణతోపాటు దిమ్మెరపరచే నేరాల సంఖ్యా పెచ్చరిల్లుతోంది. కరోనా వైరస్‌ భీతితో 'ఇంటి నుంచి పని' పద్ధతికి ప్రాధాన్యం హెచ్చిన దరిమిలా- నెట్‌వర్క్‌లో భద్రతా లోపాలే అయాచిత వరాలై సైబర్‌ చోర ముఠాలు యథేచ్ఛగా పంజా విసరుతున్నాయి. ముఖ్యంగా దిల్లీ, ముంబయి, హైదరాబాద్‌, చెన్నై, బెంగళూరు ప్రాంతాల్లో సమాచార తస్కరణ ఉదంతాలు, కోరిన మొత్తం ముట్టజెప్పాలన్న డిమాండ్లు ముమ్మరించాయి. కేవలం ఏడు నెలల్లోనే ఎనిమిది లక్షల ఫిర్యాదుల నమోదు దిగ్భ్రాంతపరచే పరిణామం. ఇది ఏ ఒక్క రాష్ట్రానికో ప్రాంతానికో పరిమితమైన సమస్య కాదు.

ఆ దేశాల తర్వాత భారత్​!

అమెరికా, యూకే, కెనడాల తరవాత అత్యంత బాధిత దేశం ఇండియాయేనని ఎఫ్‌బీఐ(అగ్రరాజ్య నిఘా విభాగం)లో అంతర్భాగమైన అంతర్జాల ఫిర్యాదు కేంద్రం చెబుతోంది. అంతగా పెనుప్రమాదం నెత్తిన ఉరుముతున్నవేళ సైబర్‌ సత్తాలో భారత్‌ 21వ స్థానానికి పరిమితం కావడం తీవ్రంగా ఆందోళనపరచే అంశం. పది లక్షల మంది నిపుణులతో సైబర్‌ సైనికదళం కూర్పు తక్షణావసరమన్న 'నాస్కామ్‌' సూచనపై కార్యాచరణ ఇంకా చురుకందుకోవాల్సి ఉంది. సైబర్‌ నిపుణుల రూపకల్పన క్రమంలో భాగంగా పాఠ్యాంశాల క్షాళన మొదలు అంచెలవారీగా ప్రణాళిక అమలు వరకు ఎలా సన్నద్ధం కావాలో ఇజ్రాయెల్‌ రెండు దశాబ్దాలనాడే ప్రపంచానికి సోదాహరణంగా చాటింది. పెరిగిన సవాళ్లకు దీటుగా జాతీయ సైబర్‌ భద్రతా వ్యూహం పరిపుష్టమై కార్యాచరణ సాకారమైతేనే, భారతీయ డిజిటల్‌ రూపాంతరీకరణ సార్థకమవుతుంది. రాష్ట్రాలమధ్య నిరంతర సమాచార మార్పిడితో ఎక్కడికక్కడ చోరబృందాల భరతం పట్టేలా ఉమ్మడి కార్యదళం అవతరణ- అంతర్జాల ఉగ్రవాద పీడకు సరైన విరుగుడు అవుతుంది!

ఇదీ చదవండి:'నౌకా సిబ్బందికి తక్షణ సాయం అందించండి'