సలామీ స్లైసింగ్... డ్రాగన్ కబ్జా వ్యూహం!

రెండో ప్రపంచ యుద్ధం తర్వాత ప్రాదేశిక భూభాగాన్ని విస్తరించుకున్న ఏకైక దేశం చైనా. ఇదెలా సాధ్యమైంది? ఇందుకోసం డ్రాగన్ దేశం అనుసరించే పద్ధతేంటి? బీజింగ్ 'కబ్జా వ్యూహం'తో భారత్​కు జరిగిన నష్టమేంటి?

విస్తరణవాదాన్ని ఒంటబట్టించుకున్న చైనా తన ప్రాదేశిక భూభాగాన్ని క్రమంగా పెంచుకుంటూ పోతోంది. భారత్​తోనే కాక సరిహద్దు దేశాలన్నింటితో కయ్యానికి సై అంటోంది. తనది కాని భూభాగాన్ని దక్కించుకునేందుకు అనేక వ్యూహాలు రచిస్తోంది. తను లక్ష్యంగా చేసుకున్న దేశాల అవకాశాలను పరిమితం చేసి కోలుకోలేకుండా చేస్తోంది. ప్రతిఘటించే అవకాశం లేకుండా సంకుచిత ప్రణాళికలు అమలు చేస్తోంది. కవ్వించి పక్కకు తప్పుకునే వైఖరి అవలంబిస్తోంది. సైన్యంపై ఆధారపడి ప్రాంతాలను కబ్జా చేస్తోంది.

ఇదీ చదవండి:చైనా వెన్నుపోటు- నేపాల్​ భూభాగం దురాక్రమణ

ప్రత్యర్థులను ఎదుర్కోవడానికి, బెదిరించి భూభాగాలను లాక్కోవడానికి, పొత్తులను విభజించడానికి క్రమక్రమంగా వ్యూహాలు అమలు చేస్తోంది చైనా. ఈ విధాన్నే సైనిక పరిభాషలో 'సలామీ స్లైసింగ్'గా వ్యవహరిస్తున్నారు.

సలామీ స్లైసింగ్!

రెండో ప్రపంచ యుద్ధం తర్వాత పొరుగుదేశాలను కవ్విస్తూ ప్రాదేశిక భూభాగాన్ని విస్తరించుకుంటున్న ఏకైక దేశం చైనా. భూభాగంతో పాటు సముద్ర జలాల్లోనూ దురాక్రమణ సాగిస్తోంది. టిబెట్​ను స్వాధీనం చేసుకోవడం, అక్సాయ్​చిన్​ను ఆక్రమించుకోవడం, పారాసెల్ దీవులను కలుపుకోవడం వంటివి చైనా విస్తరణవాద విధానానికి కొన్ని ఉదాహరణలు.

పక్కా ప్రణాళికతో

పొరుగుదేశాల భూభాగాన్ని ఆక్రమించడానికి చైనా ప్రత్యేక పద్ధతిని అవలంబిస్తుంది.

• ఆక్రమించాలనుకున్న భూభాగంపై హక్కు తమకే ఉందని తొలుత ఓ బూటకపు ప్రకటన చేస్తుంది.
• అవకాశం దొరికిన ప్రతీసారి అదే విషయాన్ని మళ్లీమళ్లీ ఉద్ఘాటిస్తుంది.
• పొరుగుదేశాల వాదనను వివాదంగా మారుస్తుంది.
• తర్వాత అంతర్జాతీయ సమాజం దృష్టిలో ఆ ప్రాంతాన్ని వివాదాస్పద స్థలంగా మార్చుతుంది.
• వివాదాన్ని పరిష్కరించుకోవడానికి సైనిక, దౌత్యపరమైన శక్తిని ప్రదర్శిస్తుంది.

ఇలాంటి వ్యూహాన్ని అనుసరించి భూభాగాన్ని పెంచుకునే విధానాన్నే 'సలామీ స్లైసింగ్' అని చెబుతారు.

ఇదీ చదవండి:దేశం ఏదైనా... దౌర్జన్యమే డ్రాగన్​ విధానం

ఈ వ్యూహాన్ని 1940లో హంగేరియన్ కమ్యూనిస్ట్ రాజకీయ నేత మాటియస్ రాకోసి రూపొందించారు. కమ్యూనిస్టేతర పార్టీలను విచ్ఛిన్నం చేయడానికి 'సలామీని ముక్కలు చేయడం' అనే ప్రణాళిక రచించారు. సైనిక పరిభాషలో దీన్ని 'క్యాబేజ్ స్ట్రాటజీ' అని కూడా పిలుస్తారు.

ఎప్పట్నుంచో మొదలు

1948లో చైనా కమ్యూనిస్ట్ పార్టీ(సీపీసీ) కుమింటాంగ్ పాలనకు ముగింపు పలికిన సమయంలో.. టిబెట్ స్వతంత్ర దేశంగా ఉంది. కొంతమంది బౌద్ధ సన్యాసులు కలిసి టిబెట్​ను పరిపాలించేవారు.

ఆ సమయంలో పీపుల్స్ లిబరేషన్ ఆర్మీ టిబెట్​పై దండెత్తి సైనిక చర్య ద్వారా మొత్తం రాజ్యాన్ని తన అధీనంలోకి తీసుకుంది. ప్రాచీన కాలం నుంచి టిబెట్ చైనాలో అంతర్భాగం అని పేర్కొంది. టిబెట్​తో పాటు లద్దాఖ్​కు తూర్పున ఉన్న షింజియాంగ్​నూ స్వాధీనం చేసుకుంది. ఈ రెండు భాగాలు కలవడం వల్ల చైనా భూభాగం రెట్టింపైంది.

ఈ సలామీ స్లైసింగ్ వ్యూహం అమలు చేసిన తర్వాత 1954-62 మధ్య దశలవారీగా అక్సాయ్​చిన్​ను తన హస్తగతం చేసుకుంది. స్విట్జర్లాండ్ పరిమాణమంత ఉండే ఈ పీఠభూమి నిజానికి జమ్ము కశ్మీర్​ సంస్థానంలో భాగం.

భారత్​లో ఇంకా ఎక్కడెక్కడ?

అక్సాయ్​చిన్​తో పాటు భారత్​లోని మరికొన్ని ప్రాంతాలపైనా చైనా కన్నేసింది. ఏకంగా 90 వేల చదరపు కిలోమీటర్ల విస్తీర్ణం ఉన్న అరుణాచల్ ప్రదేశ్​ రాష్ట్రం మొత్తాన్ని చైనాలో అంతర్భాగమని వాదిస్తోంది. అరుణాచల్ ప్రదేశ్​ను దక్షిణ టిబెట్​కు చెందిన భూభాగంగా పరిగణిస్తోంది.

• జమ్ము కశ్మీర్​లోని కారకోరం శ్రేణికి ఉత్తరాన ఉన్న 6 వేల చదరపు కి.మీ ప్రాంతాన్ని పాకిస్థాన్​ నుంచి స్వాధీనం చేసుకుంది.
• ఉత్తరాఖండ్, హిమాచల్​ ప్రదేశ్, జమ్ము కశ్మీర్​లో అక్కడక్కడా ఉన్న చిన్న ప్రదేశాలపై ఆధిపత్యం తమదేనని చెప్పుకుంటోంది.
• మొత్తం గల్వాన్ లోయపై ప్రాదేశిక హక్కు చైనాదేనని తాజాగా ప్రకటించుకుంది.

తూర్పున విస్తరణ

హిమాలయాల్లో భారత్​, టిబెట్​ను ఆక్రమించుకున్న తర్వాత చైనా తన తూర్పు సరిహద్దును విస్తృతం చేసుకోవడానికి సలామీ స్లైసింగ్​ను అటు వైపు ప్రయోగించింది. దక్షిణ చైనా సముద్రంలో దురాక్రమణలు ప్రారంభించింది.

• 1974లో పారాసెల్ దీవులను వియత్నాం నుంచి ఆక్రమించుకుంది.
• ఈ దురాక్రమణను చట్టబద్ధం చేసుకోవడానికి అక్కడ సంషా నగరాన్ని నిర్మించింది.
• 1988లో వియత్నాం నుంచే జాన్సన్ రీఫ్​ను హస్తగతం చేసుకుంది.
• 1995లో మిస్చీఫ్ రీఫ్, 2012లో స్కార్​బరో షోల్ దీవులను తన అధీనంలోకి తీసుకుంది. ఈ రెండు ప్రాంతాలు ఫిలిప్పీన్స్​కు చెందినవే.

సెంకకు దీవులపై రగడ

అహంకారంతో ఇన్ని దురాక్రమణలకు పాల్పడుతున్న చైనా... పొరుగున ఉన్న దేశాల భూభాగాలపై మూర్ఖపు వాదనలు చేస్తూనే ఉంది. ముఖ్యంగా జపాన్​కు చెందిన సెంకకు ద్వీపంపై పూర్తి అధికారం తనదేనని మొండిపట్టు పట్టింది.

ఈ ప్రాంతాన్ని డైయాయుగా పిలుస్తోంది. జపాన్​, అమెరికా చైనా వాదనను వ్యతిరేకించినప్పటికీ... తన దూకుడైన వ్యూహంతో సెంకకు ద్వీపాన్ని 'వివాదాస్పద ప్రాంతం'గా మార్చడంలో విజయం సాధించింది.

కరోనా సమయంలోనూ

ప్రపంచం మొత్తం కరోనాతో తీవ్ర సంక్షోభం ఎదుర్కొంటున్న సమయంలో చైనాలోని కమ్యూనిస్ట్ పార్టీ తన సైనిక శక్తిని ప్రదర్శిస్తోంది. తాజాగా దక్షిణ చైనా సముద్రంలో స్పార్ట్​లీ, పారాసెల్ దీవుల సమూహాల్లో కొత్త పరిపాలనా జిల్లాలను ఏర్పాటు చేసింది. సముద్రంలోని మరో 80 దీవులకు పేర్లు పెట్టింది.

ఇదీ చదవండి:ఆ దేశాలపై చైనా దూకుడు వెనుక కారణం?

ఈ పరిస్థితుల్లో వియత్నాం, ఫిలిప్పీన్స్ వంటి దేశాలు చైనా చర్యలను దౌత్యపరంగా ఖండించడం మినహా ఏమీ చేయలేకపోతున్నాయి. చైనా సైన్యం మాత్రం అడుగు ముందుకేసి వియత్నాంకు చెందిన చేపలు పట్టే ఓడను సముద్రంలో ముంచేసింది. సముద్ర జలాల్లో సైనిక విన్యాసాలు నిర్వహించింది. దక్షిణ చైనా సముద్రంలో పహారా కాసే పీఎల్​ఏ దక్షిణ థియేటర్ కమాండ్ బృందం గత నెలలో యాంటీ-సబ్​మెరైన్ శిక్షణ కార్యక్రమాలు చేపట్టింది.

గగనతలంలో కవ్వింపులు

తైవాన్, జపాన్​ దేశాలతో పాటు దక్షిణ కొరియా సైతం చైనా దుస్సాహసానికి బలవుతోంది. సైనిక బలాన్ని ఆసరాగా చేసుకొని కవ్వింపులు మొదలుపెట్టింది. చైనాకు చెందిన 'లియావోనింగ్ ఎయిర్​క్రాఫ్ట్ క్యారియర్' ఈ ఏడాది తైవాన్, జపాన్ జలాలకు దగ్గరగా వెళ్లింది. పీఎల్​ఏకు చెందిన ఎయిర్​క్రాఫ్ట్​ తైవాన్ గగనతలానికి దగ్గరగా ఆరుసార్లు చక్కర్లు కొట్టింది.

దక్షిణ చైనా సముద్రంలో చైనా వాయు రక్షణ గుర్తింపు జోన్​(ఏడీఐజడ్)ను ఏర్పాటు చేసే అవకాశం ఉందని తైవాన్ అనుమానం వ్యక్తం చేసింది. దీనిపై తైవాన్ రక్షణ మంత్రిత్వ శాఖ ప్రకటన కూడా జారీ చేసింది.

ఈ ఏడాది మార్చిలో దక్షిణ కొరియా ఎయిర్​ డిఫెన్స్ జోన్​లోకి చైనాకు చెందిన వై-9 నిఘా విమానం అనుమతి లేకుండా ప్రవేశించింది. దాదాపు 35 నిమిషాల పాటు ఆ ప్రదేశంలో చక్కర్లు కొట్టింది. దీంతో దక్షిణ కొరియా ప్రతిఘటించాల్సి వచ్చింది. ఫైటర్ జెట్లను ఉపయోగించి చైనా విమానానికి హెచ్చరికలు జారీ చేసింది.

అణు పరీక్షలు

షింజియాంగ్​లోని లాప్​ నుర్​ ప్రాంతంలో చైనా అణు పరీక్షలు నిర్వహిస్తున్నట్లు తెలుస్తోంది. సబ్​-క్రిటికల్, జీరో-యీల్డ్ న్యూక్లియర్ టెస్ట్​లను ప్రారంభించినట్లు గత నెలలో పలు వార్తలు వచ్చాయి.

ఇలా తన భూభాగాన్ని పెంచుకోవాలన్న దుర్బుద్ధితో పొరుగుదేశాల సార్వభౌమత్వంపై డ్రాగన్ దేశం దెబ్బకొడుతోంది. సంపాదించిన శక్తిని మొత్తం దురాక్రమణే లక్ష్యంగా వినియోగిస్తోంది. ఏడాదికి ఎంత భూభాగాన్ని కొత్తగా ఆక్రమించామన్న విషయంపై చైనా కమ్యూనిస్టు పార్టీ లెక్కలు వేసుకుంటోంది. అంతర్జాతీయ చట్టాలను గౌరవించకుండా కుయుక్తులు పన్నుతోంది.

ఇవీ చదవండి: