'పౌష్టికాహారం తినండి - కొవిడ్‌ను ఎదుర్కోండి' అనే నినాదంతో రోగనిరోధక శక్తి పెంపొందించే మార్గదర్శకాల్ని ఏడాది క్రితమే భారత ఆహార భద్రత, ప్రమాణాల ప్రాధికార సంస్థ (ఎన్‌ఎస్‌ఎస్‌ఏఐ) విడుదల చేసింది. కేంద్ర-రాష్ట్ర ప్రభుత్వాలు, వైద్య, ఆరోగ్యరంగ నిపుణులు సైతం కరోనా కట్టడికి రోగ నిరోధకశక్తి పెంపుదలే అత్యుత్తమ మార్గమని సూచిస్తున్నారు. దీంతో ప్రజలు కూరగాయలు, పండ్లు, పప్పుదినుసులు, మాంసం, పాలు, తేనె లాంటి ఆహార పదార్థాలను విరివిగా కొనుగోలు చేస్తున్నారు. ఇదే అదనుగా కల్తీ వ్యాపారులు అక్రమాలకు తెరతీశారు. అధిక గిరాకీ ఉన్న ఆహార పదార్థాల కృత్రిమ కొరత సృష్టిస్తూ ధరలు పెంచుతున్నారు. మరోవైపు కల్తీ, నాసిరకం వస్తువుల జోరు పెరుగుతూ ప్రజారోగ్యం కునారిల్లుతోంది. ఆహార, వ్యవసాయ సంస్థ-2020 నివేదిక ప్రకారం దేశంలో సుమారు 19 కోట్ల జనావళిని పోషకాహార లోపాలు పీడిస్తున్నాయి. పౌష్టికాహార భద్రత కల్పించాలని జాతీయ ఆహార భద్రత చట్టం సమున్నత లక్ష్యాన్ని నిర్దేశించింది. కానీ, ఆచరణలో అది విఫలమయింది. భారత్‌లో ఆహార భద్రత, ప్రమాణాల ప్రాధికార సంస్థ- ఆహార నాణ్యతను పర్యవేక్షిస్తుంది. దేశవ్యాప్తంగా 28.5శాతం ఆహార పదార్థాలు, 39శాతం పాలు ప్రమాణాలకు తగినట్లు లేవని ఎన్‌ఎస్‌ఎస్‌ఏఐ అధ్యయనంలో వెలుగుచూసింది.
ఏది కల్తీయో తెలియడం లేదు..
దేశీయ మార్కెట్లో లభ్యమవుతున్న వస్తువుల్లో నాణ్యతా ప్రమాణాలు కొరవడటం వల్ల వ్యక్తిగతంగానే కాదు, దేశార్థికానికీ నష్టం వాటిల్లుతోంది. కలుషిత ఆహార పదార్థాలతో సంభవించే వ్యాధుల వల్ల దేశంపై ఏటా రూ.1.09 లక్షల కోట్లు నష్టపోతోంది. ఇది దేశ ఆర్థిక వ్యవస్థకు అశనిపాతంలా మారడమే కాకుండా, ప్రజల మరణాలకు కారణమవుతోంది. కల్తీని నివారించకపోతే 2025 నాటికి క్యాన్సర్‌ లాంటి వ్యాధులు ముమ్మరిస్తాయన్న ప్రపంచబ్యాంకు హెచ్చరికలు ఆందోళనకరం. వంట నూనెలు, వనస్పతి వంటి వాటిలో ఉండే సాచురేటెడ్‌ కొవ్వు పదార్థాలు (టీఎఫ్‌ఏ) ప్రాణాంతకంగా మారి ఏటా ప్రపంచవ్యాప్తంగా 5.4లక్షల మంది మృత్యువు పాలవుతున్నారు. అందులో భారత్‌లోనే ఏటా 77 వేల మరణాలు సంభవిస్తున్నాయని ప్రపంచ ఆరోగ్య సంస్థ తెలిపింది. టీఎఫ్‌ఏ వల్ల గుండెజబ్బులు, రక్తపోటు, మధుమేహం, స్థూలకాయం వంటి రోగాలు విజృంభిస్తున్నాయి. ప్రజలకు ఏది కల్తీయో తెలియడం లేదని, విధి లేని పరిస్థితుల్లో విషాహారం తీసుకొంటున్నారని గతంలోనే తెలుగురాష్ట్రాల ఉమ్మడి హైకోర్టు వ్యాఖ్యానించింది. కలుషితాహార నియంత్రణ చట్టం-1954ను సంస్కరించి, సమర్థంగా అమలు చేయాలి.
మందులు కూడా నకిలీ..
చైనా, సింగపూర్‌, బ్రిటన్‌ వంటి దేశాలు మన్నికైన ఆహారాన్ని ప్రజలకు అందించేందుకు ఎంతో కృషి చేస్తున్నాయి. భారత్‌లో ఖరీదైన ఔషధాలు, ఇంజక్షన్లు సైతం నకిలీవి ఉత్పత్తి అవుతున్నాయి. భారత వాణిజ్య పారిశ్రామిక సంఘాల సమాఖ్య (అసోచామ్‌) నివేదిక ప్రకారం, దేశీయ విపణిలో 25శాతం వరకు మందులు నకిలీవే. సుమారు రూ.30 వేల కోట్ల అక్రమదందా ఔషధాల పేరిటే కొనసాగుతుండటం పరిస్థితి తీవ్రతకు అద్దం పడుతోంది. నకిలీ మందుల బాగోతాన్ని అరికట్టడానికి మషేల్కర్‌ కమిటీ చేసిన సూచనలను కేంద్ర, రాష్ట్ర ప్రభుత్వాలు ఆచరించాలి. ఔషధ నియంత్రణ యంత్రాంగాన్ని బలోపేతం చేయాలి.