నా పేరు అపర్ణ. అమ్మానాన్నలకు నేను, అక్క ఇద్దరమే సంతానం. ఆయన ఓ మిల్లులో పనిచేసేవారు. డిగ్రీలో ఉండగా నేను నా క్లాస్‌మేట్ రవిని ప్రేమించాను. ఇది తెలియని అమ్మానాన్న నాకో పెళ్లి సంబంధం తీసుకువచ్చారు. అక్క పెళ్లిలో నన్ను చూసిన ఆయన కట్నం లేకుండా నన్ను పెళ్లి చేసుకోవడమే కాక పెళ్లి ఖర్చులూ తానే భరిస్తానని చెప్పడంతో నాన్న ఒప్పుకున్నారు. రవితో జరిగిన విషయం చెప్పి వెంటనే మా ఇంట్లో వాళ్లతో మా పెళ్లి గురించి మాట్లాడమని, లేదంటే నన్ను ఎక్కడికైనా తీసుకెళ్లి పెళ్లి చేసుకోమని చెప్పాను. రెండిటికీ కాదన్న రవి తానింకా చదవాల్సింది చాలా ఉందని, మా ఇద్దరి కులాలు వేరు కావడంతో పెద్దలు ఇప్పుడే ఒప్పుకునే వీల్లేదని, పెద్దలు కుదిర్చిన పెళ్లి చేసుకోమని నాకు సర్దిచెప్పాడు. దాంతో చేసేదేం లేక ఆ పెళ్లికి తలవంచాను.
పెళ్లాయ్యాక నా భర్తకు దూరంగానే ఉండేదాన్ని. రెండుమూడుసార్లు దగ్గరకు రావడానికి ప్రయత్నిస్తే గట్టిగా అడ్డు చెప్పడంతో ఆ తర్వాత ఆయన ఆ ప్రయత్నం చేయలేదు. నా మనసులో ఉండే సంకోచాలన్నీ తొలగిపోయి నా అంతట నేనే మారతాననుకున్నారేమో- ఆ విషయం గురించి బలవంతం చేయలేదు. నెలనెలా ఆయనిచ్చే డబ్బుతో నా ఫ్రెండ్స్‌తో పాటు సినిమాలకు, షికార్లకు తిరిగేదాన్ని. కొంతకాలానికి నాన్న పనిచేసే మిల్లులో అగ్నిప్రమాదం జరగడంతో నాన్న ఉద్యోగం పోయింది. ఖాళీగా ఉండటంతో తిండికి కూడా కష్టంగా మారింది. నేను ఈ విషయాలేవీ పట్టించుకోలేదు. నాకిష్టంలేని పెళ్లి చేసి నా గొంతు కోసారన్న అక్కసుతో వారి గురించి ఆలోచించడమే మానేశాను. మా ఆయనే కొంతకాలం వాళ్లకు ఆర్థిక సాయం చేశారు. తర్వాత నాన్నతో చిన్న వ్యాపారం పెట్టించారు. ఈ సమస్య తీరింది అనుకునేలోపే అమ్మకు అనారోగ్యం. ఆయన వాళ్లకు చేయించిన బీమా ద్వారా కేవలం ఏడు లక్షలే వచ్చాయి. అమ్మ ఆపరేషన్‌కు కనీసం పదిలక్షలు కావాలి. ఈయన ఏమాత్రం వెనకాడకుండా తన ఎకౌంట్‌లో దాచుకున్న మూడు లక్షలు పెట్టి అమ్మకు ఆపరేషన్ చేయించారు. వేరేవాళ్లెవరైనా ఆ పరిస్థితుల్లో ఉంటే, ఆయన మంచితనానికి వాళ్ల మనసు మారేదేమో, కానీ నా మనసు మాత్రం కరగలేదు.
అమ్మ ఆపరేషన్‌కు అంత ఖర్చు పెట్టారని తెలిసి మా అత్తయ్య సూటిపోటి మాటలు అనడం ప్రారంభించింది. ఓ రోజు గొడవ పెట్టుకున్నా. 'కావాలంటే నేను పని చేసి మీ డబ్బు మీకు తిరిగి తెచ్చిస్తా' అన్నా. దానికి ఆవిడ 'సరే చూస్తాను అసలు ఇవ్వగలవో.. లేదో..' అనేసరికి ఉక్రోషం పొడుచుకొచ్చింది. వెంటనే ఉద్యోగ ప్రయత్నాలు ప్రారంభించాను. నేను చేసింది కేవలం డిగ్రీ. దానికి వచ్చే ఉద్యోగాలన్నీ తక్కువ జీతం వచ్చేవే. ఆయన నన్ను పీజీ చేసి ఆ తర్వాత ఉద్యోగం చేయమని ప్రోత్సహించారు. మా అత్తగారు దీనికి ఒప్పుకోవడంతో నేను పీజీ చేశాను. తర్వాత ఆయన తన ఫ్రెండ్‌కి తెలిసిన ఓ మంచి కంపెనీలో ఉద్యోగంలో చేర్పించారు.